Një vendim të sforcuar e ka konsideruar Përparim Kulluri, avokati i ish-kryebashkiakut të Kukësit Safet Gjici, vendimin e sotëm të Gjykatës së Posaçme për klientin e tij, duke e dënuar me 3 vite burg, që i zbritet në 2 vite nga gjykimi i shkurtuar.
Në një prononcim për mediat, pas dhënies së vendimit, avokati i Gjicit u shpreh se do të presin vendimin e zbardhur me argumentat dhe më pas do e ankimojnë në shkallët e tjera.
“Nga korrupsion e dënuan për shpërdorim të detyrës. Kur të shohim argumentat për këtë vendim do ndjekim rrugët tona për ankimim. Do shohim vendimi kur të zbardhet do bëjmë ankimim. Vendimi shumë i sforcuar, nuk e di se çfarë do shkruajnë aty. Do lexoj vendimin e zbardhur që unë ta kuptoj si e ka argumentuar gjykata vendimin”, tha ai.
GJKKO dënoi sot me 3 vite burg Safet Gjicin, që i zbritet në 2 vite nga gjykimi i shkurtuar, si dhe me 5 vite heqjen e të drejtës për të ushtruar funksione publike, në lidhje me video-skandalin me Alma Kaçin. Kjo e fundit u dënua me një vit burg. Të dyve iu rrëzua akuza e korrupsionit, teksa Gjici u shpall fajtor për veprën penale “shpërdorim detyre”, ndërsa Alma Kaçi për prostitucion.
