Regjisori i njohur Bujar Kapexhiu ka qenë i pranishëm mbrëmjen e kësaj të marte në protestën në mbështetje të kreut të PD-së Sali Berisha, poshtë banesës së këtij të fundit, ku ka mbajtur edhe një fjalim.
Gjatë fjalës së tij para mbështetësve demokratë, Kapexhiu u shpreh se në këto 10 vite të qeverisjes nga Edi Rama shteti, në çdo fushë ka marrë formën e një lëmshi, ku në krye ka një nyje, e cila mund të pritet ose nga ndërkombëtarët ose nga qytetarët.
Kapexhiu shtoi më tej se qeveria është bërë sezonale, sapo bien gjethet bien dhe ministrat e kabinetit.
“Unë sot nuk vij vetëm si dibran, por vij si qytetar, qytetar i Shqipërisë, qytetar i këtij shteti që ka nja 10 vjet që ka marrë formën e një lëmshi dhe nuk po din si ta ç’mpleksi. Lëmsh në qeveri, lëmsh në politikë, lëmsh në drejtësi, lëmsh në art, kulturë, kudo vetëm një lëmsh. Qeveritarët thonë se më mirë, se në Evropë mund të shkojmë duke u rrokullisur si lëmsh. Por jo, e keqja është se në krye të lëmshit ka një nyje. Fija ka një nyje dhe këtë nyjë mund ta heqin vetëm dy, ose ndërkombëtarët ose ju.
Pra ne duhet që këtë nyje ta presim, gërshërët i kemi, i kemi përdorur edhe herë tjetër. Duke ju parë edhe juve, herë të mërzitur dhe herë të revoltuar, për gjëra që ju mbani qëndrime të tilla ndoshta unë nga profesioni që kam më vjen me qesh. Edhe ne të qeshim, sepse e qeshura revoltës i jep më force. Qeveria është bërë sezonale, stinorë, bien gjethet bien ministrat, lindin gjethe lindin ministra, dhe çfarë ministrash, që nuk i njeh askush. Francezi thotë kurrë të dëgjuar dhe kurrë të parë”, tha nder të tjera regjisori i njohur.
