I ftuar në intervistën e Fax News, ish-shefi i antidrogës, zoti Dritan Zagani, ka dhënë opinionin e tij në lidhje me rrëfimin e ish-zv/kryeministrit Arben Ahmetaj.
Sipas Zaganit, ish-zv/kryeministri nuk dha ndonjë deklaratë shokuese dhe ndonjë detaj konkret që t’i ofrojë drejtësisë mundësinë që të “ngulë gozhdën” tek të korruptuarit.
“Të gjithë e dinë që Rama ka lejuar kanabizimin dhe që jemi kthyer në “Kolumbinë e Europës”. Të gjithë e dimë për Veliajn dhe inceneratorët“, tha ai.
Zagani tha se është detyra e çdo qytetari që të ndihmojë drejtësinë e jo më e zotit Ahmetaj, i cili ka qenë ish-zv/kryeministër dhe ministër i financave.
Ai shtoi se nuk është e çuditshme që zoti Ahmetaj ka marrë kërcënime.
“Nuk është e çuditshme. Të gjithë marrin kërcënime. Edhe unë kam marrë“, tha ai.
I pyetur nga Albi Rakip se çfarë mendimi ka ai në lidhje me deklaratat e Ahmetajt, i cili e cilësoi veten si “kokë turku”, ai u shpreh:
“Ai nuk u bë kokë turku për arsyen se nuk asgjë. Ai akuzohet për afera korruptive. Po ashtu edhe Saimir Tahiri. Problemi qëndron se ata e quajnë veten ashtu në prizmin e grupit kriminal. Ai nuk i ka bërë vetë krimet, por e ka lejuar Rama. Edhe Tahiri nuk e lejoi vetë kanabizimin, por me ndihmën e Ramës. Por fjala “kokë turku” nuk e përjashton atë nga veprat penale”.
I pyetur gjithashtu se si e priti ai reagimin e menjëhershëm të SPAK-ut, Zagani u përgjigj:
“Unë pres më shumë. Kam një shpresë se gradualisht do të shkojnë të gjithë te SPAK-u. SPAK-u do të jetë një ditë atje ku duhet, por tani nuk është.“
