Forcat zjarrfikëse në Malësinë e Madhe kanë arritur të shpëtojnë 6 shtetas shqiptar, të cilët ishin bllokuar në Majën e Çardakut.
Njoftimin e ka bërë Bashkia Malësi e Madhe, nëpërmjet rrjetit social “Facebook”, ku sqaron se shtetasit me vendbanim në Tiranë, kishin mbetur të bllokuar për disa orë. Njoftohet se njëri nga shtetasit ka thyer këmbën.
Zjarrfikësit kishin bërë më shumë se 4 orë ngjitje në një terren të akullt, me ngrica dhe në errësirë.
Bashkia Malësi e Madhe u bën thirrje të gjithë qytetarëve që të udhëhiqen nga guidat turistike të licensuara.
Njoftimi i Bashkisë Malësi e Madhe:
Pas një operacioni shumë të vështirë dhe delikat, forcat zjarrfikëse Malësi e Madhe kanë bërë të mundur shpëtimin e 6 personave, të cilët ishin bllokuar në Majën e Çardakut.
Zjarrfikësit kanë bërë më shumë se 4 orë ngjitje në një terren mjaft të vështirë me akull, ngrica dhe në errësirë, duke sfiduar kushtet atmosferike për t’iu ardhur në ndihmë turistëve nga Tirana, ku njëri nga ata gjatë ngjitjes ka thyer këmbën dhe i gjithë grupi është bllokuar deri në momentin e mbërritjes së forcave zjarrfikëse Malësi e Madhe, falë të cilëve ky operacion shpëtimi u krye me sukses.
Nisur nga ky rast, përsërisim thirrjen tonë për të gjithë turistët e aventurës, që duhet të udhëhiqen gjithmonë nga guida turistike lokale të liçensuara për të kryer ngjitjet e tyre në terrenet tona malore.
Faleminderit ekipit të zjarrfikësve Malësi e Madhe, të cilët përfunduan me sukses këtë operacion shpëtimi.
