Qeveria e Kubës tha, se po heton një “shkëputje të plotë” të rrjetit elektrik të vendit. Kjo ndodh ndërkohë që administrata e Trump-it po bllokon dërgesat e naftës venezueliane drejt Kubës.
Qeveria kubaneze njoftoi të hënën (16.03.2026) se vendi ishull në Amerikën Latine është goditur nga një ndërprerje mbarëkombëtare e energjisë.
Ministria e Energjisë dhe Minierave tha, se ka pasur një “shkëputje të plotë” nga rrjeti elektrik. “Po hetohen shkaqet dhe po aktivizohen protokollet për rikthimin e furnizimit”, postoi ministria në X.
Pse po përjeton Kuba ndërprerje të energjisë?
Kuba ka pësuar ndërprerje të gjata të energjisë elektrike, pasi administrata e presidentit të SHBA-së Donald Trump po bllokon dërgesat e naftës nga Venezuela drejt ishullit. Venezuela ka qenë furnizuesi kryesor i naftës për Kubën.
Operacioni i SHBA-së për arrestimin e presidentit venezuelian Nicolás Maduro në janar ishte një goditje e rëndë për qeverinë kubaneze. Që atëherë, Trump ka mbështetur presidenten në detyrë Delcy Rodríguez dhe furnizimet me naftë drejt Kubës janë ndalur.
Përveç kësaj, Trump është zotuar të vendosë tarifa ndaj vendeve që i shesin naftë Kubës. Meksika dhe Rusia janë dy nga furnizuesit e tjerë të naftës për Kubën.
Të premten (13.03.2026), Kuba përjetoi një protestë të dhunshme mes ndërprerjeve të energjisë dhe çmimeve të larta të ushqimeve, ku protestuesit sulmuan dhe shkatërruan një ndërtesë që i përkiste Partisë Komuniste në pushtet.
Presidenti kubanez Miguel Díaz-Canel tha të premten se Kuba nuk ka marrë dërgesa nafte prej tre muajsh dhe se vendi është i detyruar të mbështetet në energjinë diellore, gazin natyror dhe termocentralet. Díaz-Canel shtoi gjithashtu se Kuba ka zhvilluar bisedime me SHBA‑në lidhur me krizën e saj energjetike dhe ekonomike.
Vetëm pak ditë pasi nisën bisedimet, zëvendëskryeministri kubanez Oscar Perez‑Oliva Fraga i tha NBC News të hënën se Kuba planifikon t’u lejojë kubanezëve që jetojnë jashtë vendit të investojnë dhe të zotërojnë biznese në Kubë. Ky ndryshim politikash do të përfshinte edhe kubanezët që jetojnë në Shtetet e Bashkuara.
Trump ka sugjeruar më parë se ndryshimi i regjimit në Kubë mund të jetë hapi i radhës pas luftës që po vazhdon mes SHBA‑Izrael kundër Iranit.
Presidenti amerikan u tha gazetarëve në bordin e Air Force One të dielën (15.03.2026) se Kuba “dëshiron të arrijë një marrëveshje, dhe unë mendoj se së shpejti ose do të arrijmë një marrëveshje, ose do të bëjmë çfarëdo që duhet të bëjmë.” /DW
