Eksponentë të lartë të Partisë Demokratike u kanë bërë thirrje socialistëve tu bashkohen në protestën e së Hënës (ora 17:00) para parlamentit, kundër kryeministrit Edi Rama.
Gjatë mbledhjes së Këshillit Kombëtar, sekretari i përgjithshëm i PD-së Flamur Noka u shpreh se beteja po bëhet për demokracinë.
“Ne demokratët u themi socialistëve se beteja për të burgosur Sali Berishën është përpjekja për të instaluar një njeri në pushtet. Kur të mbarojë punë me ne, ai do t’u kthehet ju, të vetëve, saç bëri Enver Hoxha. Ne nuk do ta lejojmë dhe ju ftojmë edhe ju të na bashkoheni! Kjo nuk është betejë për Sali Berishën dhe Partinë Demokratike, por për Shqipërinë si vend normal, demokratik, pluralist, euro-atlantik”, tha Noka.
Më vonë gjatë ditës, demokratët zhvilluan protestën e përditshme poshtë banesës së kreut të opozitës Sali Berisha, i cili bëri të njëjtin apel për socialistët. Ai tha se intervista e Arben Ahmetajt u tregoi atyre se Rama vepron njëjtë si dikatori Enver Hoxha.
Berisha theksoi se për socialistët e ndershëm, është detyrim të ngrihen kundër Ramës.
“Kjo është ora e bashkimit, e bashkimit të shqiptarëve rreth idealeve të tyre patriotike. Por protesta juaj është frymëzim dhe shpresë për të gjithë ata socialistë, të cilët binden se Rilindja ishte përbindëshi që shkatërroi jo vetëm Shqipërinë, por edhe idealet e tyre, edhe partinë e tyre. Kjo protestë është shpresë për çdo socialist që beson se partia e tij nuk mund të ketë një zë, një votë, një njeri, Edi Ramën”, tha Berisha.
Kjo protestë është thirrje, frymëzim për çdo socialist që dëgjoi nga goja e njeriut të dytë më të fuqishëm të partisë së tyre, zëvendëskryeministrit, se si Edi Rama në kryesinë e partisë së tij do t’i përsëriste ekzakt të njëjtën frazë, të njëjtin kërcënim me kokë dhe jetë njëlloj si Enver Hoxha në Byronë Politike, armiqve të tij. Ndaj dhe socialistë të ndershëm, e keni mision të ngriheni kundër tij. Se Edi Rama nuk është gjë tjetër veçse një padrino, i cili kur kërcënon zëvendësin e tij, ndihmësin, bashkëpunëtorin e tij kryesor, imagjinoni se çfarë mund të bëjë me ju”, shtoi kryedemokrati.
Apeli për fermerët
Thirrje për bashkim në protestën e së hënës, Berisha bëri edhe për fermerët, që kanë zhvilluar së fundmi disa tubime.
“Bashkohuni në këtë protestë, merrni traktorët, merrni veglat tuaja, sfurqet dhe çdo gjë, merrni lopët, merrni gjithçka keni, dilni në rrugë, dilni në protestë, dilni të fitojmë. Dilni se po nuk protestuat ju, toka juaj në shkretëtirë do kthehet ose do merret nga klanet e drogës të Edi Ramës. Dilni në protestë sepse shkatërrimi juaj është shkatërrimi i Shqipërisë”, tha kreu i PD-së.
Fjalën e mbylli me një apel për gjithë qytetët për tu bashkuar “në protestën e fuqishme të ditës së hënë para parlamentit për t’i rikthyer tempullin e demokracisë shqiptarëve të lirë, për t’i rikthyer parlamentin qytetarëve sovranë që kanë votuar, për të mbrojtur aty pluralizmin, për të mbrojtur aty të ardhmen e Shqipërisë dhe shqiptarëve”.
