Dy personave nga Elbasani u janë vendosur nën sekuestro rreth 550 mijë euro pasuri, pasi dyshohet se janë fituar nga veprimtaritë kriminale.
Vendimi i Gjykatës së Elbasanit është ekzekutuar nga Policia në kuadër të operacionit të “Real estate”, teksa bëhet fjalë për shtetasit Arjan Kamami dhe Uard Kaloti, të dy nga Elbasani, të cilët janë dënuar njëri në Itali, tjetri në Belgjikë, për veprën penale “Trafikimi dhe shfrytëzimi për prostitucion”.
“Në zbatim të vendimit të Gjykatës së Shkallës së Parë të Juridiksionit të Përgjithshëm Elbasan, u bë sekuestrimi i 2 pasurive të shtetasit Arjan Kamami, të regjistruara në emër të tij dhe të të afërmve, konkretisht: 1 objekt 3-katësh (me aktivitet bar, restorant dhe hotel), në Cërrik, dhe 1 automjet “Lamborghini”. Nga veprimet hetimore dyshohet se pasuritë e sekuestruara e kanë burimin nga veprimtaritë kriminale të kryera nga shtetasi Arjan Kamami, i cili është i dënuar në Belgjikë, për veprën penale “Trafikimi dhe shfrytëzimi për prostitucion”;
Po në zbatim të vendimit të kësaj Gjykate u bë sekuestrimi i pasurisë së shtetasit Uard Kaloti, 34 vjeç, banues në Elbasan, konkretisht i një objekti banimi me sipërfaqe 105 m2, në Elbasan. Nga veprimet hetimore dyshohet se kjo pasuri e sekuestruar e ka burimin nga veprimtaritë kriminale të kryera nga shtetasi Uard Kaloti, i cili ka qenë i dënuar më parë, në Itali, për veprën penale “Trafikimi dhe shfrytëzimi për prostitucion”.” – thuhet në njoftimin e Policisë.
Materialet procedurale i kaluan Prokurorisë, për veprime të mëtejshme.’- njofton policia.
