Blegtorët e zonave të Jugut kanë dalë sërish këtë të enjte në hyrje të aksit Kardhiq-Delvinë, për të protestuar kundër “monopolit” të fabrikave të përpunimit të qumështit, të cilat vendosën ulje drastike të çmimit të blerjes së qumështit nga blegtorët, nga 180 lekë të reja për litër vitin e shkuar, në 120 lekë të reja për litër sot, ndërkohë që çmimi i shitjes së qumështit të përpunuar në markete vazhdon të jetë ende i shtrenjtë për qytetarët.
Blegtorët pritet të zhvillojnë sot një takim me ministren e Bujqësisë, Anila Denaj, për t’i prezantuar katër pikat kryesore të protestës: rritjen e çmimit të shitjes së qumështit, dyfishimin e subvencioneve, sistemimin e lerave malore dhe mundësimin e kontratave 15-vjeçare për kullotat.
“Ne kemi 4 pika zotëri i dashur. As për subvensionet as për kullotat as për veprat ujore. Nuk ka më kthim pas sepse ne po vuajmë si qeni”- tha njëri prej blektorëve.
I pyetur se pse nuk ulen për të komunikuar me administratën, fermeri nënkuptoi se ky moment tashmë kishte kaluar dhe se takimi do të bëhet vetëm me ministren.
“Këtu nuk ka administratë. Administrata rri në zyra, të bëjë punën në zyra. S’ka punë administrate. Ku ka qenë administrata që të kujtohet për ne sot. Ku kanë qenë. Jemi të pranishëm këtu sot, madje ka edhe më shumë. Takim pa mediet e pranishme nuk ka, ja themi që tani ta dëgjojë sepse në Tepelenë është”- përfundoi blegtori.
