Ish-drejtuesi i lartë i Policisë, Arben Hajdarmataj, ka folur mbrëmjen e sotme mbi hetimet për vrasjen e Liridona Ademajt në Kosovë, nga bashkëshorti i saj Naim Murseli.
I ftuar në emisionin “Open” në News24, Hajdarmataj u shpreh se në aspektin e hetimit kjo çështje tanimë është e mbyllur, ndërsa shtoi se beson se krimi ka ndodhur kryesisht për motive të dobëta.
Sipas tij motivi kryesor mund të jetë xhelozia ose tradhtia brenda çiftit.
“Mendoj se kjo çështje është e mbyllur tashmë në aspektin e hetimit. Në fund të fundit mendoj se krimi ka ndodhur kryesisht për motive të dobëta. Besoj se ka një farë ngarkese edhe nga faktorë të jashtëm, për shembull tradhtia mund të shihet pak më ndryshe në krahina të ndryshme. Rrethanat mund të ndryshojnë edhe nga trysnia e rrethit shoqëror. Motivet besoj janë xhelozia ose tradhtia nga ajo që shohim”, tha ai mes të tjerash.
