Është ekstraduar nga Italia drejt vendit tonë 39-vjeçari nga Lezha, Paulin Simoni, i dënuar me burg për falsifikimin të dokumenteve të pronave në bregdetin e Lezhës.
Lajmin është konfirmuar nga Policia e Shtetit, e cila ka publikuar edhe pamjet e mbërritjes së tij në aeroportin e Rinasit. Ekstradimi i tij është bërë i mundur pas bashkëpunimit me Interpol Romën.
“Ky shtetas ishte shpallur në kërkim ndërkombëtar nga Interpol Tirana, pasi Gjykata e Posaçme e Apelit për Korrupsionin dhe Krimin e Organizuar, me vendimin e datë 15.04.2022, e ka dënuar me 3 vjet e 8 muaj burg, për veprat penale “Falsifikimi i dokumenteve”, “Falsifikimi i vulave, stampave ose i formularëve”, “Shpërdorimi i tokës” dhe “Pastrim i produkteve të veprës penale”.” – thuhet në njoftimin e Policisë.
Paulin Simoni ka qenë gjyqtar futbolli në Kategorinë Superiore në vendin tonë. Ai doli në përgjimet e prokurorisë për rastin e ish-deputetit socialist Arben Noka dhe familjarëve të tij, të cilët janë dënuar për skemën e tjetërsimit të pronave në bregdetin e Shëngjinit. 39-vjeçari dyshohej dhe si i lidhur me grupin kriminal Avdylaj të Shijakut, që akuzoheshin për trafik droge.
