Teksa kryeministri Edi Rama po e lë Kuvendin pa opozitë duke përjashtuar masivisht deputetët kundërshtarë, duket se të njëjtën rrugë do të ndjekë edhe kreu i Bashkisë së Tiranës, Erion Veliaj në Këshillin Bashkiak me anëtarët e opozitës, që të vjedhin sa më të qetë.
Ditën e sotme, kryetarja e Këshillit Bashkiak të Tiranës, Romina Kuko ka vendosur përjashtimin për dy muaj të këshilltarit të koalicionit “Bashkë Fitojmë” Tedi Blushi nga mbledhjet e Këshillit dhe komisioneve.
Ky vendim vjen pas gjestit simbolik që Blushi bëri në mbledhjen e Këshillit Bashkiak të 22 Dhjetorit të vitit të kaluar, ku i vendosi një palë pranga Veliajt tek mikrofoni, pasi ai mbeti “i paparekshëm” nga SPAK për aferën e inceneratorit.
Në një prononcim për mediat, Tedi Blushi u shpreh se vendimi përjashtimin e tij është marrë nga Veliaj, pasi nuk do opozitë në Këshillin Bashkiak, teksa e konsideroi si shkelje flagrante të të drejtave të opozitës dhe përpjekje për t’i mbyllur gojën dhe për ta izoluar.
“Përjashtimi im 2 mujor nga Këshilli Bashkiak i Tiranës, është marrë si vendim nga Veliaj sepse nuk do opozitë në këshillin e bashkisë. Shkelje flagrante e të drejtave të opozitës dhe përpjekje për t’i mbyllur gojën dhe për ta izoluar. Dorëzimi i prangave live, ishte një akt simbolik për qindra familjarë të Tiranës. Akt simbolik për qindra persona me aftësi të kufizuar që kërkojnë pajisjen me ambiente zyre ku të mund të ushtrojnë aktivitetin e tyre”, tha ai.
VIDEO/ Opozita “i vë prangat” live Erion Veliajt në mbledhjen e Këshillit Bashkiak
