Policia ka reaguar për ngjarjen e rëndë që u regjistrua ditën e djeshme në “Spitalin Amerikan 2” në Tiranë ku humbi jetën pacientja 28-vjeçare Irida Hasalla, një ditë pasi kreu një ndërhyrje estetike për humbjen nga pesha.
E reja iu nënshtrua një procedure estetike të liposucionit ditën e hënë, ndërsa të martën pësoi trompozë dhe ndërroi jetë. Mësohet se familjarët e 31-vjeçares kanë depozituar një kallëzim në komisariatin nr. 4 ndaj mjekëve të spitalit, ku i akuzojnë për mjekim të pakujdesshëm.
Policia bën me dije se janë kryer veprimet e para procedurale si autopsia, marrja në pyetje e familjarëve, mjekut dhe anestezistit që kanë marrë pjesë në operacion.
“Ditën e djeshme, më datë 30.01.2024, është marrë njoftim se në një spital privat, pas një operacioni, ka ndërruar jetë shtetasja I. H., 28 vjeçe, banuese në Tiranë. Pas marrjes së njoftimit, në drejtimin e Prokurorisë, është ngritur grupi hetimor dhe janë kryer veprimet e para procedurale si autopsia, marrja në pyetje e familjarëve, marrja në pyetje e mjekëve dhe anestezistit që kanë marrë pjesë në operacion. Materialet do ti kalojnë Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme procedurale”, njofton policia.
Një ditë më parë, vëllai i viktimës, Arenc Hasalla, deklaroi për mediat se motra e tij vuante nga tumori në mitër për të cilin kurohej në Belgjikë.
Sipas tij, mjekët e Spitalit Amerikan ishin në dijeni të kësaj gjëje dhe nuk duhet ta kryenin operacionin, por i thanë se ndërhyrja nuk do të ndikonte në gjendjen e saj. Aktualisht trupi i Irida Hasallës ndodhet në morg ku po i bëhet autopsia.
