Një publikim në rrjetet sociale tregoi pak ditë më parë një të dënuar në burgun e Reçit i cili dëshmonte me zë dhe figurë se mbante armë të ftohta në qeli për tu mbrojtur.
Një dëshmi e re publikohet këtë të hënë, ku i njëjti i burgosur ekspozon drogën.
“Kam mbi 20 mijë euro mall, të shpërndarë në copa”, thotë i riu në një video të publikuar nga “JOQ” teksa tregon dozat.
Ai shprehet se mbahet në qeli padrejtësisht dhe bën kërkesë për liri, ndërsa dëshmon për një sistem tërësisht të korruptuar.
“Këtu është korrupsion i gjallë. Këtu çfarë s’bëhet. Komplet me staf, me edukator, me shef policie, çdo gjë krim”, thotë.
“Këtu komandon Stërkaj i cili ka lidhje direkt në parlament. Paulin Stërkaj”, shton i riu, teksa më tej thotë se i rrezikohet jeta nga bandat kriminale dhe tregon se ka katër vite që punon për ta, duke shpërndarë kokainë e kanabis me doza.
“I kam 40 e ca video jashtë te familja ime, të cilat faktojnë çdo punonjës, të gjithë blozë janë këtu. Komplet, komplet, të gjithë i kam me video që pinë këtë lloj droge këtu brenda. I kam për votimet, vitin që kaloi, komplet videot”, thotë më tej në dëshminë e tij.
“Më kanë marrë në qafë padrejtësisht. Unë kërkoj mbrojtje nga shteti. Kërkoj çdo lloj institucioni që ekziston, ku ka të drejtat njeriu të merret për bazë jeta ime, jeta e familjes sime. Jeta e vëllait tim, se po bëjmë burg kot. As kam vrarë as kam prerë. Ju lutem kërkoj avokat, nuk e di kush ka ndikuar në dosjen time. Vetëm të vijë t’i sqaroj, t’i them si është puna. Të shohin dosjen time, të më marrin për bazë. Edhe unë jam njeri. Dua të jem me familjen time, me nipërit me mbesat, me dal, me shëtit, me jetu, si gjithë njerëzimi”, apelon ai.
Lidhur me pamjet e publikuara, ende nuk ka një reagim nga autoritetet.
