Gazetari Andi Bushati thotë së drejtësia ndaj Sali Berishës po vepron me dy standarde. Kjo sipas tij, sepse reforma në drejtësi e ka vënë sistemin gjyqësor në shërbim të kryeministrit Rama, i cili nuk ka arsye ta kursejë kundërshtarin politik. Sipas Bushatit, Berisha dhe përfaqësuesit e tij ligjorë e kanë pasur parasysh këtë fakt në strategjinë që kanë ndjekur që në krye të herës.
“Plani B, Berishën e ka nxjerrë fitues. Plani B i tij ishte ta mbante SPAK-un nën presion. Detyroje tjetrin të gabojë. Berisha ushtroi trysni. Ne pamë që SPAK-u për hir të penalizimit të Berishës shkallmoi çdo procedurë. Pra, nga një njeri që dyshohet se ka vjedhur në bashkëpunim me dhëndrin dyshohet se është atje për t’u ndëshkuar politikisht. Berisha po trajtohet me dy standarde, por me një standard më të ulët se qytetarët e tjerë. Sali Berisha po trajtohet me një standard shumë më të ulët se kundërshtari i tij politik. Këtu vijmë te pyetja: Po ky sa kohë do mbahet në arrest shtëpie pa qenë i akuzuar? E keqja sipas meje është se ne kemi bërë një reformë në drejtësi që gjykata dhe prokurorinë ia ka vënë në dispozicion pushtetit politik. Pra kemi një aparat drejtësie të vënë në funksion të dëshirave të Edi Ramës. SPAK dhe gjykatat po i japin mundësi Ramës që me veglat e tij të japë ndëshkim politik për kundërshtarët politikë”, tha Bushati.
