Efektivi i Policisë Arben Pjeçi u vetëvra me armën e shërbimit brenda Komisariatit të Policisë së Durrësit këtë të Enjte (25 janar 2024).
Forcat e Policisë e zbuluan aktin tragjik vetëm pasi familjarët e tij kishin shfaqur shqetësimin se ai nuk u përgjigjej telefonatave të tyre.
Siç njofton vetë Policia, pas marrjes së kallëzimit, uniformat blu kanë marrë një seri veprimesh për të zbuluar vendndodhjen e tij, përfshirë përgjime, lokalizim telefoni dhe kontroll nëpër rrugët dhe vendet ku ai mund të gjendej.
Pas një kontrolli të imtësishëm nëpër qytet, më në fund punonjësit e Policisë janë kthyer në Komisariat dhe kanë kontrolluar për të ndjerin Pjeçi, në lokacionin më të logjikshëm, në zyrën e tij të punës.
Kjo situatë ngre dyshimin për aftësitë e Policisë së Durrësit për të luftuar kriminalitetin, kur pati vështirësi të gjente inspektorin e policisë brenda zyrës së tij, të pajetë.
“Për njoftimin e bërë nga familjarët është marrë kallëzim, është njoftuar prokurori i gatshëm, janë kryer një sërë veprimesh procedurale, si dhe janë vënë në kontroll numrat telefonikë, me qëllim lokalizimin e vendndodhjes së këtij shtetasi.
Në kuadër të të gjitha veprimeve operacionale dhe procedurale për kërkimin e tij, rreth orës 16:15, në ambientet e Komisariatit të Policisë Durrës është hapur me forcë zyra e oficerit Policisë Gjyqësore, Arben Pjeçi, i cili është gjetur i vetëvrarë, me armën e shërbimit”, thuhet në njoftimin zyrtar të Policisë.
Është e habitshme se si askush nga kolegët e tij nuk ka dëgjuar të shtënën e armës brenda zyrave të Komisiariatit apo nuk ka vënë re se ai nuk ka dalë nga institucioni.
Uniformat blu e kanë pasur më të lehtë të kontrollojnë në të gjithë Durrësin dhe të mos shohin “në shtëpinë” e tyre, aty ku Arben Pjeçi vendosi t’i japë fund jetës së tij.
Zyrtarisht, Policia dyshon se Pjeçi është vetëvrarë, pasi ka qenë në kushte të rënda psikologjike.
“Punonjësi i Policisë Arben Pjeçi është dënuar me vendim të formës së prerë nga Gjykata e Shkallës së Parë e Juridiksionit të Përgjithshëm Durrës, për kundravajtjen penale “Plagosje e lehtë”, në bazë të nenit 89 të Kodit Penal.
Vendimi i Gjykatës i formës së prerë ka filluar të ekzekutohet nga strukturat përgjegjëse të Shërbimit të Provës dhe Policisë së Shtetit.
Punonjësi i Policisë, në kushtet e depresionit për penalitetet që sjell vendimi i dënimit të formës së prerë që e kushtëzonte në të ardhmen me ndërprerjen e marrëdhënies së punës me Policinë e Shtetit, është vetëvrarë me armën e shërbimit në ambientet e zyrës së punës, në Komisariatin e Policisë Durrës”, thuhet në njoftimin zyrtar të uniformave blu.
Arben Pjeçi aktualisht ishte në detyrën specialist i Policisë Kriminale në komisariatin e Policisë së Durrësit. Ai kishte një karrierë rreth 35-vjeçare në radhët e uniformave blu./ Boldnews.al
