Nga Boldnews.al
Gëzim Topçiu ka “harruar” datën kur është ulur në karrigen e kryetarit të Bashkisë së Maliqit. Aktualisht, ai është në mandatin e 7-të në atë bashki, ndërkohë që më parë është thirrur “Beu”. Më pas, kur fitoi mandatin e 5-të, nofka i ndryshoi në “Pashai i Maliqit”. Por, “gradat” iu shtuan dhe aktualisht ai është as më pak e as më shumë por “Sulltani i Maliqit”. Megjithëse Maliqi është një nga qytezat më të varfëra të Shqipërisë, teksa shumica e banorëve janë me ndihmë ekonomike, ai qëndron kryelartë në atë pozicion, teksa banorët po largohen dita-ditës brenda dhe jashtë Shqipërisë.
Madje, “akuza” ka pasur edhe nga një biznesmen që ka investuar në atë zonë, ku Topçiu i siguroi se do të kishte punëtorë, por nuk i dërgoi askënd. Ndërkohë, ai vijon në atë detyrë duke firmosur përditë dhënie ndihmë ekonomike me qëllim mbushjen e kutive të votimit. Një skemë e pastër, ku rezulton se më shumë se gjysma e buxhetit të kësaj bashkie shkon për rroga dhe për ndihmë. Mësohet se administrata e kësaj bashkie është fryrë së tepërmi, teksa janë krijuar drejtori edhe të kota. Gjithsesi, i vetmi person që ka kontroll të plotë është Topçiu, i cili firmos dhe vendos se kujt do t’i japë tenderin e radhës.
Sipas dokumenteve që disponon redaksia e BoldNews.al, Bashkia e Maliqit i ka dhënë një tender prej 1.8 milionë euro firmës “Korsel”. E njëjta firmë që u skualifikua nga tenderët se kishte paraqitur dokumente false. Atë që s’e bëri dot Raqka i Korçës e bën vetë Topçiu, i cili me këtë tender ka synuar që ta “rehabilitojë” këtë firmë, të gjetur me shkelje të mëdha dhe një nga të preferuarat e eksponentëve të mazhorancës. Në vitin 2022 kjo firmë u skualifikua për 18 muaj nga tenderët, pasi kishte paraqitur dokumente false në një procedurë tenderuese në Tiranë.
Që prej asaj kohe, “Korsel” ka qenë në hije, teksa ka vijuar me kontratat që ka pasur në fuqi, në Korçë, Sarandë, Elbasan etj. Por, edhe në këto qytete ka pasur probleme me pastrimin. Mësohet se kjo firmë i ka pasur lidhjet me të forta në Korçë, ku ka fituar tenderat e pastrimit që nga viti 2012. Tashmë zhvendoset pak më në veri të Korçës, në qytezën e Maliqit për të synuar që të fitojë procedurat në ato bashki, pasi ka “mbështetje” të madhe nga ministri i Mbrojtjes Niko Peleshi.
Dokumenti i mësipërm i është drejtuar firmës “Korsel”, për tenderin me objekt “shërbimi i pastrimit, grumbullimit, largimit të mbetjeve urbane dhe gjelbërimit për Bashkinë Qendër Maliq dhe Njësitë Administrative Libonik, Pojan, Vreshtas, Pirg”. Afati i kësaj kontrate është plot 4 vite, edhe pasi Topçiu të jetë larguar nga drejtimi i kësaj bashki. Ligji i ri për Qeverisjen Vendore e ka përcaktuar se maksimumi i mandateve është 3 dhe Topciu, që nga hyrja në fuqi e këtij ligji, ka fituar 3 mandate. Por, jo kontratat dhe “nderet”, pasi ai po bën procedura tepër të gjata, që t’i ketë gjendje edhe gjatë “pensionimit”. Mësohet se firma “Korsel” ka ofertuar 154.369.528 lekë pa TVSH. Një nga 3 firmat në garë nuk dha ofertë, ndërkohë që ajo që dha, firma “GRIALD” u skualifikua nga gara.
Redaksia e BoldNews.al ka investiguar disa herë vendimmarrjet e bashkive për këtë firmë. Madje, vetë kryetari i Bashkisë së Tiranës, Erion Veliaj, ka pranuar skandalin ku në tenderin 6 milionë USD të pastrimit të zonës 2 janë përdorur dokumente të falsifikuara. Por, deri më sot, për këtë skandal të madh, asnjë person nuk është hetuar dhe arrestuar. As zyrtarë dhe përfaqësues të firmës private. Skandali i ngjason tenderit të Unazës së Madhe, ku u përdorën dokumente false. Dhe, kjo procedurë u “kopjua” nga vartësit e Lalit, të cilët kanë pranuar me sy mbyllur dokumentet e ngarkuara nga firma private.
Por, nëse KPP ka faktuar falsifikimin e dokumenteve, ku kanë qenë vartësit e Lali Erit? Apo janë bërë palë dhe kanë lejuar veprimet? A mbajnë përgjegjësi këta zyrtarë që kanë shpallur fitues të një tenderi një firmë me dokumente false? Në shkrimin e atëhershëm, BoldNews.al citonte se ishin bërë vetëm hetime administrative, por e çuditshme ishte se asnjë organ akuze nuk kishte vepruar deri më tani. Madje as në këtë kohë, kur e njëjta firmë që përdori dokumente false vijon të fitojë tendera dhe para’ publike!
