Gjykata e Apelit la në fuqi masën “arrest shtëpie” për Sali Berishën. Vendimi u dha këtë të enjte nga gjyqtarja Iliriana Olldashi, një ditë pasi gjykata dëgjoi argumentet e palëve.
Avokati i Berishës, Genc Gjokutaj paralajmëroi ankim të masës në Gjykatën e Lartë, ndërsa e cilësoi vendimin politik. Sipas tij, qëllimi është izolimi i Berishës.
“Unë ju thashë dhe dje, kërkesa për përjashtimin e gjyqtares u shqyrtua pas marrjes së vendimit për Berishën, është një gjë absurde. As më shumë e as më pak, Gjykata e Apelit vërtetoi që u dekriptua përfundimisht qëllimi politik i mbajtjes në izolim të zotit Berisha. Pasi për SPAK-un dhe për Gjykatën Anti-Korrupsion nuk ka rëndësi nëse ai paraqitet ose jo, nëse ai jep shpjegime apo jo, është në dispozicion të procesit apo jo, qëllimi është që ai të izolohet. Zoti Berisha erdhi një ditë para gjykimit, Gjykata e shtyu sot, nuk e kuptova arsyen. Ka bërë dhe një gabim tjetër, se nuk është shprehur për kërkesën për përjashtimin që ne kemi animuar bashkë me vendimin.Beteja vazhdon! Ajo e shpalli vendimin, nuk kemi ça presim…Do të rekursohet vendimi i Apelit”, deklaroi Gjokutaj.
Berisha është nën arrest shtëpie që prej 30 Dhjetorit pasi akuzohet për korrupsion pasiv në procedimin penal për privatizimin e ish-kompleksit sportiv “Partizani”.
Vetë kryedemokrati i ka quajtur akuzat ndaj tij të motivuara politikisht nga kundërshtari i tij politik, kryeministri Edi Rama. Ndërsa procedurën e ndjekur ndaj tij deri në ashpërsimin e masës së sigurisë e ka cilësuar antikushtetuese.
Dy ditë më parë, kryedemokrati u pyet për herë të parë nga prokurorët e SPAK lidhur me procedimin penal. Në një prononcimn për gazetarët pas daljes nga SPAK, Berisha tha se nuk u paraqit asnjë provë kundër tij, por vetëm akuza-mashtrime.
Javën e kaluar, Prokuroria e Posaçme refuzoi kërkesën e ish-kryeministrit për të marrë pjesë në seancat plenare në Kuvend. Prokurorët Arben Kraja dhe Enkelejda Millonai vlerësuan se ligji nuk e parashikon miratimin e një kërkese të tillë. Lidhur vendim që është apeluar nga Berisha, kryedemokrati është shprehur se nuk ishte kompetenca e prokurorisë për ta marrë, por gjykata.
