Me numërimin mbrapsht që ka nisur për olimpiadën e Parisit, të gjithë shtetet janë duke u bërë gati duke grumbulluar lojtarët më të mirët për çdo sport.
Në basketboll për meshkuj nuk është lajm që Shtetet e Bashkuara të Amerikës janë favoriti kryesor për medaljen e arit.
Skuadra e drejtuar nga Steve Kerr duket se do të jetë e papërballueshme këtë verë. Mediat përtej oqeanit bëjnë me dije se yjet e NBA janë të gatshëm për të formuar një “Dream Team”.
Në listën paraprake bien në sy emrat e mëdhenj të këtij sporti si LeBron James, Stephen Curry, Kevin Durant, Anthony Davis, Jayson Tatum, Kawhi Leonard, Joel Embiid, Anthony Edwards e shumë të tjerë.
Trajneri Steve Kerr do të njoftojë në muajt në vijim se cilët do të jenë 12-të të përzgjedhurit për eventin e madh që zhvillohet një herë në 4 vjet.
Në SHBA ka një uri të madhe për të fituar, pasi skuadra amerikane ka zhgënjyer në 2 botëroret e fundit ku ka marrë pjesë. Vitin e shkuar SHBA me lojtarë të rinj në skuadër u mund në gjysmëfinale nga Gjermania, që më vonë u shpall kampione e atij turneu.
