Lulzim Basha ka reaguar pasi ambasada e SHBA-së dhe BE-së e nxorrën bllof në lidhje me deklaratën e djeshme ku kërkonte merita, pasi sipas tij, kishte arritur të bindë mazhorancën socialiste për të çuar përpara Reformën Zgjedhore me ndërmjetësimin e ndërkombëtarëve.
Fillimisht, Ambasada e SHBA-së e më pas edhe zyra e BE-së iu përgjigjën interesit të mediave duke deklaruar se nuk janë përfshirë në asnjë ndërmjetësim sa i takon tejkalimit të krizës në komisionin e posaçëm parlamentar për reformën zgjedhore.
Pas reagimit të ndërkombëtarëve, Lulzim Basha ka korigjuar veten me anë të një postimi në rrjetet sociale, ku zëvendëson termin ndërmjetësim me mbështetje. Sipas tij, falë edhe kësaj mbështetje Komisioni për Reformën Zgjedhore pritet të nisë punën së shpejti.
“Në emër të Partisë Demokratike të Shqipërisë përsëris mirënjohjen time për mbështetjen që partnerët strategjikë të Shqipërisë, SHBA, BE dhe MB si edhe OSBE-ODIHR i japin procesit të reformës zgjedhore në Shqipëri. Falë edhe kësaj mbështetje, pas një periudhe të gjatë heshtjeje, Komisioni për Reformën Zgjedhore pritet të nisë punën së shpejti. Listat e hapura, barazia e votës, vota e diasporës dhe votimi dhe numërimi elektronik janë prioritetet e Partisë Demokratike të mishëruara në paketën e propozimeve ligjore të depozituara në Kuvendin e Shqipërisë. Koha për t’ju dhënë shqiptarëve një Kod Zgjedhor pa hile dhe pengesa për lirinë dhe barazinë e votës!”, thuhet në reagimin e Bashës.
