Reparti i Pediatrisë në Spitalin Rajonal të Beratit është i tejmbushur me fëmijë të sëmurë. Situata e rënduar e fëmijëve paraqitet me një kuadër klinik të ashpër në rrugët e frymëmarrjes dhe temperaturë të lartë që dominohet me vështirësi.
Shefi i Repartit të Pediatrisë Berat, Vladimir Kumaraku shprehet se virozat në qarkullim janë agresive dhe sëmundshmëria zgjat deri në 1 javë.
“Ka një rritje të konsiderueshme të numrit të të prekurve nga infeksionet virale të stinës ku dominojnë çrregullimet e aparatit respirator të shoqëruara me temperaturë të lartë, me kollë të fortë spastike, dhe në shumicën e rasteve kemi pasur komplikacione që shoqerohen me bronkopneumoni, pneumoni dhe te fëmijët e vegjël që kanë karakteristike bronkiolitet”,-tha shefi i pediatrisë, Kumaraku.
Çdo ditë në reaprtin e pediatrisë paraqiten, 80 deri në 100 fëmijë, një pjesë e të cilëve kanë nevojë për shtrim në spital dhe kujdes të specializuar mjekosor.
“Numri i vizitave është goxha i konsiderueshëm, është i lartë, cdo ditë shkojnë nga 80 deri në 100 vizita që paraqiten në repart, pothuajse i gjithë kapaciteti i repartit të pediatrisë është i plotësuar, por duke marr ëshkas dhe nga intervista juaj dua qe dhe t’ju drejtohem edhe familjarëve, te pakten per moshat qe janë mbi 5 vjeç te jenë më të kujdeshëm dhe mos të vijnë të paraqiten direkt në repartin e pediatrisë por ti mbajnë fëmijët e tyre duke i mbikqyrur temperaturën”,-u shpreh Kumaraku.
Virozat e stinës dhe gripi kanë kanë shkaktuar edhe komplikacione tek pacientët e vegjël duke bërë që disa fëmijë të transportohen në drejtim të Tiranës për kujdes edhe më të specializuar mjeksorë.
