Janë zbardhur detaje të reja nga opoeracioni policor i koduar “Antwerp”, ku u godit një organizate kriminale që drejtohej nga shtetas shqiptarë, me bazë në qytetin belg me të njëjtin emër si operacioni, që trafikonte drogë dhe armë, nga Amerika e Jugut në Belgjikë.
Burime bëjnë me dije se ky grup kriminal u zbulua gjatë përgjimeve të Policisë Shqiptare që po kryente për operacionin “Flakë në det” përgjatë verës së vitit të kaluar, ku u godit grupi i “baronit të drogës” Gëzim Çela.
Mësohet se në mënyrë rastësore nga përgjimet dhe hetimet e tjera pro aktive, u zbulua banda e shqiptarëve të Antwerp-it, por që nuk kishin lidhje me grupin e Gëzim Çelës.
Policia shqiptare identifikoi autorët e veprimtarisë kriminale dhe pas verifikimeve rezultoi se asnjë prej tyre nuk ishte në Shqipëri.
Pas një pune disa javore, 12 shqiptarët u lokalizuan në Antwerp dhe disa qytete të tjera belge. Të gjitha informacionet e mbledhura iu dërguan autoriteteve belge, të cilat rezultuan të vlefshme për hetimet.
Në Belgjikë, disa prej anëtarëve të grupit kriminal, 6 prej tyre, ishin në hetim prej 2022-shit për trafik armësh me drejtues një 51-vjeçar shqiptar, por dosja u plotësua me të dhënat e dërguara atje nga autoritetet shqiptare për trafikun e kokainës që bëhej përmes detit për në portin e Antwerp.
Nga hetimet rezulton se shqiptarët ishin të kujdesshëm në komunikimeve dhe bazë e takimeve për trafikun e drogës ishte një kafene në Antwerp ndërsa drejtues i madh i grupit është një 55-vjeçar shqiptar.
Kujtojmë se në pranga u vunë shtetasit: Valdrin Markaj, 45 vjeç, Vitor Berisha, 49 vjeç, Fatos Markaj, 52 vjeç, Sami Berisha, 64 vjeç, Nehat Berisha, 42 vjeç, Flamur Delic, 34 vjeç, Fatmir Delic, 60 vjeç, Zirkret Pepa, 50 vjeç (alias Christos Sachlikidis), Bujar Hoxha, 50 vjeç, Gezim Shabani, 41 vjeç, Alban Ferma, 29 vjeç dhe Artan Vigani, 42 vjeç. Gjashtë të arrestuarit e tjerë janë nga vendet e tjera.
Autoritetet bënë me dije se vijojnë hetimet e përbashkëta për dokumentimin e plotë të veprimtarive kriminale të këtij grupi, identifikimin dhe kapjen e pjesëtarevë të tjerë të grupit.
