Luan Mjeshtri, administrator i njësisë Administrative Ostren njëkohësisht vëllai i kryetares së bashkisë Bulqizë, Festime Mjeshtri, u arrestua gjatë muajit dhjetor nën akuzën për shpërdorim detyre si pjesë e grupit që shiste vërtetime false të origjinës bullgare në Ostren të Bulqizës. Vërtetimi shitej kundrejt ryshfetit 100 mijë lekë (të vjetra).
Kryetarja e Bashkisë së Bulqizës, Festime Mjeshtri ende nuk ka reaguar në lidhje me arrestimin e vëllait të saj, teksa ishte po ajo që e kishte vendosur në konflikt të interesit vëllain e saj në atë detyrë.
Nisur nga ky fakt, deputetja e PD-së, Dhurata Çupi, i është drejtuar ditën e sotme me një shkresë Inspektoriatit të Lartë për Deklarimin e Pasurisë dhe Konfliktit të Interesit, ku i kërkon që të fillojë urgjentisht një hetim administrativ, ku të konstatojë situatën e konfliktit të interesit ndërmjet kryebashkiakes në detyrë të Bulqizës Festime Mjeshtri dhe administratorit të Njësisë Administrative të Ostrenit, Luan Mjeshtri, motër e vëlla.
“Nisur nga situata e paligjshmërisë dhe konfliktit të interesit në Bashkinë Bulqizë, i kam kërkuar sot Inspektoriatit të Lartë për Deklarimin e Pasurisë dhe Konfliktit të Interesave që të fillojë urgjentisht një hetim administrativ, të konstatojë situatën e konfliktit të interesit ndërmjet kryebashkiakes në detyrë dhe administratorit të Njësisë Administrative të Ostrenit, motër e vëlla, si dhe të ndërmarrë masat e tjera ndëshkuese në përputhje me ligjin. Funksionarët e lartë publikë dhe veçanërisht të zgjedhurit duhet të ushtrojnë detyrën me integritet, transparencë dhe përgjegjshmëri në shërbim të interesit publik dhe jo interesave personale a familjare.” – shkruan Çupi në postimin e saj në rrjete sociale.
