Kryetari i Partisë Demokratike, Sali Berisha ka reaguar në lidhje me aktin e rëndë të dhunimit të tre shqiptarëve në Mal të Zi.
Berisha shkruan se, ky është një akt i rëndë me motive raciste.
Kryetari i PD-së, ka kujtuar edhe dhunën policore të ushtruar ndaj ish-këshilltarit të presidentit, Petraq Milo.
Një akt kriminal racist i rëndë!
Dhunimi i tre të rinjve shqiptar duket për motive etnike në Malin e Zi nga grupe kriminale dhe me uniformë paramilitare ultranacionaliste, përbën një akt të verbër racizmi primitiv të rëndë dhe të dënueshëm.
Kjo dhunë nuk është një rast i izoluar mbasi vjen pas dhunës shtetërore që policë në pikëkalimi kufitar ushtruan ndaj profesorit të nderuar Petraq Milo. Këto akte të nxitura nga ultranacionalistët e Beogradit vjinë në kundërshtim të hapur me projektet serioze për marrëdhënie miqësore dhe vlerën e këtyre marrëdhënieve midis vendeve fqinje.
Duke i uruar shërim të shpejtë të plagosurve dhe dënuar me ashpërsinë më të madhe autorët e kësaj dhune shtazore, kërkoj nga autoritetet e vendit fqinj, të cilët kanë arrestuar pesë prej banditëve, t’i vendosin para ligjit, sponsorët, organizatorët dhe autorët e këtij akti të shëmtuar. #sb
