Një aksident i rëndë ka ndodhur pasditen e sotme në Kalabri të Italisë. Dy makina janë përplasur me njëra-tjetrën e si pasojë kanë humbur jetën katër persona dhe është plagosur një tjetër.
Mediat fqinje raportojnë se viktimat janë tre gra dhe një mashkull, të gjithë të rinj – nga 20 deri në 35 vjeç.
Ata po udhëtonin drejt provincës së Reggio Calabria me një Fiat Panda, e cila u përplas me një Fiat Idea që po shkonte drejt veriut.
Viktimat janë Antonella Romeo, 19 vjeç, Elisa Pelle, 25, Domenico Romeo, 28 dhe Teresa Giorgi, 35. Ata mbetën të bllokuar në makinë dhe u desh ndërhyrja e zjarrfikësve për të nxjerrë trupat.
Dy makinat u shkatërruan plotësisht dhe kjo të bën të dyshosh se përplasja mes dy mjeteve ka ndodhur “kokë më kokë”. Aksidenti ka ndodhur menjëherë pas një kthese.
