Për të disatën ditë radhazi, edhe këtë të enjte pasdite, mbështetës së Sali Berishës u mblodhën në një tubim në mbështetje të kreut të Partisë Demokratike. Ky i fundit ndodhet nën masën e arrestit shtëpiak më mbikëqyrje policore.
Mes mbështetësve deputetë dhe anëtarë të Partisë Demokratike, si Flamur Noka apo Belind Këlliçi, të cilët theksuan për gazetarët në terren se kreu i opozitës Berisha është “i burgosur politik” me urdhër të kryeministrit Edi Rama. E pranishme ishte dhe vajza e kryedemokratit, Argita Malltezi e cila tha se arsyeja e protestës është “lufta për dinjitetin”. Duke iu përgjigjur interesit të mediave se si i kalon ditët Sali Berisha, ajo u shpreh se “babai ka qenë në punë non stop, edhe kur ka qenë me grip”.
Edhe pse gjykata i ka ndaluar Sali Berishës komunikimin me jo familjarët, kryedemokrati iu drejtua me një fjalim mbështetësve nga dritarja e banesës. Duke ironizuar vendimin e marrë ndaj tij nga GJKKO që miratoi kërkesën e SPAK, kreu i PD tha se faji i tij është se ndërhyri për të shpëtuar opozitën e Shqipërisë kur ajo u kap peng nga Edi Rama. “Faji i Saliut ishte se denoncoi çdo ditë aferat e shekullit, inceneratorët, sterilizatorët, vjedhjet në Portin e Durrësit, lidhjet e tmerrshme të Edi Ramës dhe qeveritarët me bandat, me trafikantët e drogës”, shtoi.
“Sot, një eksponent, ish-i dërguari i Xhorxh Sorosit në vitin 1992 në Tiranë, i quajturi Fron Nahzi, të cilin e përzura bashkë me kolegun e tij për 48 orë nga Shqipëria si agjent i rezidentit të Millosheviçit në Tiranë, shprehte gëzim dhe kënaqësi për vënien në arrest të Sali Berishës. Do i them këtij mjerani, këtij shqiptari në pamje dhe serb në shpirt, se as ti, as Xhorxhi dhe askush në botë nuk do mund të ndalë përpjekjen e Sali Berishës për realizimin e idealeve demokratike. Buzëqeshjen, gëzimin do ua ngrijmë në fytyrë”, tha më tej.
Fjalimin e mbylli me paralajmërimin se “ky dimër do të shkrijë të gjithë akujt” dhe u shpreh i bindur në triumfin e forcës politike që drejton.
“Ftoj shqiptarët, kudo që janë, me dy gishta lart, të ngrenë lart e më lart flamurin kombëtar dhe flamurin e PD, flamurin e pluralizmit politik. Duke përfunduar edhe njëherë, ju falënderoj me shumë mirënjohje dhe ju garantoj se ky dimër do të shkrijë të gjithë akujt. Kjo lëvizje në këtë dimër do të shkrijë të gjithë akujt. Do ecë e sigurt në fitoren e PD-së, fitoren e Shqipërisë. Rrofshi ju, rroftë PD, rroftë Shqipëria. Fitore, fitore, fitore”, tha kreu i PD.
Berisha është nën arrest shtëpie që prej 30 Dhjetorit pasi GJKKO pranoi kërkesën e SPAK për të ashpëruar masën e sigurisë detyrim paraqitje ndaj tij. Berisha akuzohet për korrupsion pasiv në procedimin penal për privatizimin e ish-kompleksit sportiv “Partizani”. Vetë kryedemokrati i ka quajtur akuzat ndaj tij të motivuara politikisht nga kundërshtari i tij politik, kryeministri Edi Rama. Ndërsa procedurën e ndjekur ndaj tij deri në ashpërsimin e masës së sigurisë e ka cilësuar antikushtetuese.
