Një ngjarje e rëndë ka tronditur francezët në mbrëmjen e Krishtlindjeve, pasi persona janë gjetur pa shenja jete në një apartament në Meaux , në Francën veriore.
Mediat vendase raportojnë se viktimat janë një grua dhe katër fëmijët e saj, teksa i dyshuari kryesor për këtë krim të rëndë dyshohet se është babai i familjes, një 33-vjeçar tashmë në arrati.
Raportohet se policia është në kërkim të babait 33-vjeçar, teksa prokurori Jean-Baptiste Bladier konfirmoi për mediat franceze se shërbimi i policisë gjyqësore të Versajës po hetonte mbi ngjarjen e rëndë.
Kjo do të ishte një tjetër vrasje e shumëfishtë në familje e kryer nga një baba në tre muajt e fundit në Ile-de-France, rajon i Parisit.
Në fund të nëntorit, një burrë 41-vjeçar shkoi në një stacion policie për të rrëfyer vrasjen e tre vajzave të tij të moshës nga 4 deri në 11 vjeç në Alfortville. Një muaj më parë një xhandar vrau tre vajzat përpara se të bënte vetëvrasje në shtëpinë e tij në Vemars.
