Ashtu siç pritej, kreu i PD-së, Sali Berisha nuk është paraqitur në seancën e sotme në GJKKO që ka nisur në orën 10:00, ku do të zhvillohet seanca për ashpërsimin e masës së sigurisë ndaj tij për çështjen e privatizimit të ish-kompleksit “Partizani”.
Avokatët e tij, Genc Gjokutaj dhe Sokol Mëngjesi, në ambientet e GJKKo-së, ku burime për mediat bëjnë me dije se ata do të paraqesin disa kërkesa paraprake, duke i konsideruar të rëndësishme për ecurinë e procesit”.
Kjo do të thotë se ky proces pritet të zgjasë disa orë, pasi gjykata duhet të shqyrtojë të gjitha të dhënat, provat dhe faktet që ka prokuroria për ashpërsimin e masës, më pas do të ketë edhe një vendim. Gjykata do të kërkojë kohë për t’i dhënë përgjigje të gjitha kërkesave të avokatëve të Sali Berishës.
Seancë e sotme në GJKKO vjen pas vendimit të Kuvendit më 21 Dhjetor, i cili miratoi kërkesën e SPAK me 75 vota pro të mazhorancës për heqjen e imuniteti të liderit demokrat.
GJKKO i ka caktuar Sali Berishës masën e sigurisë “detyrim paraqitje” si dhe “ndalim të daljes jashtë shtetit”. Megjithatë, Sali Berisha ka refuzuar që të parqaqitet në gjykatë të hënën e parë dhe të tretë të çdo muaji duke argumentuar se vendimi është antikushtetues, pasi nuk ishte marrë më parë autorizim për heqjen e imuniteti ndaj tij.
Por SPAK i qëndroi mendimit se masa e sigurisë “detyrim paraqitje” si dhe “ndalim të daljes jashtë shtetit” ishin të një karakteri që konsiderohen kufizime dhe jo heqje lirie. Për këtë shkak SPAK ka kërkuar shtrëngimin e masës së sigurisë në “arrest shtëpi”.
Ligji i jep 5 ditë gjykatës për të marrë në shqyrtimin kërkesën e SPAK dhe gjyqtarja Irena Gjoka pritet që në seancën gjyqësore të sotme ka thërritur për të dëgjuar palët, nga njëra anë prokurorët e SPAK dhe nga ana tjetër personin nën hetim Sali Berisha dhe avokatët e tij. Gjyqtarja Gjoka mund të vendosë sot pasi të dëgjojë argumentet e palëve ose të dërgojë në “arrest në shtëpi” Berishën, ose të lërë në fuqi masat e mëparshme.
Berisha akuzohet nga SPAK për kryerjen e veprës penale “Korrupsioni pasiv i funksionarëve të larte shteterore ose te zgjedhurve vendore, kryer në bashkëpunim. Ish-kryeministri i ka konsideruar akuzat ndaj tij dhe dhëndrit të tij Jamarbër Malltezi, si sulm politik, pasi sipas tij, nuk ka asnjë fakt dhe dokument që të ngrihen dyshimet mbi akuzat.
Sipas SPAK-ut, Berisha në kohën kur ka qenë kryeministër ka vendosur në funksion të interesave të dhëndrit të tij bazën ligjore, si edhe ka ushtruar presion mbi vartësit për të nxitur plotësimin sa më të shpejtë të procedurave të kthimit të pronës dhe privatizimit të godinave të degraduara të ish-klubit sportiv “Partizani”. Ndërsa, për Jamarbër Malltezin dhe ndërtuesin Fatmir Bektashi, SPAK-u deklaron se ata kanë përfituar shuma të mëdha financiare nga tjetërsimi i truallit në ndërtime të larta.
