Gjykata e Posaçme ka shtyrë për ditën e nesërme në orën 11:00 seancën për Sali Berishën për të cilën SPAK ka kërkuar shtrëngimin e masës së sigurisë në “Arrest Shtëpie”.
Genc Gjokutaj, avokati i liderit të opozitës Sali Berisha, pasi doli nga seanca që u zhvillua sot në GJKKO, u bëri të ditur mediave se çfarë ndodhi në këtë seancë.
“Seanca e sotme kishte të bënte me kërkesën e SPAK-ut për zëvendësimin e masës së sigurimit ndaj z. Berisha në arrest shtëpie. Në fillim të seancës ne i kërkuam gjyqtares të jepte dorëheqjen në shkakun e bërë tashmë të ditur për shkak njëanshmërie. Z. Berisha ka qenë kryetar i KLD. Dhe për të mos e zgjatur këtë pikë, ajo nuk u shpreh as pro, as kundër, ndërkohë që përpara seancës ne e kishim dorëzuar në Sekretarinë e Gjykatës, e kishim dorëzuar kërkesën me të gjitha provat që provojnë faktin se Berisha ka qenë kryetar i KLD dhe në shkurt të vitit 1996, gjyqtarja e çështjes ishte shkarkuar. Nga ana e prokurorëve vijoi seanca, pavarësisht se ne kishim bërë kërkesën për përjashtim deri në momentin kur shteruan kërkesën prokurorët dhe ne bëmë një set pyetjesh, për të cilat ata bënë sikur dhanë përgjigje, por në fakt ato përgjigje nuk u dhanë”, tha Gjokutaj.
Por SPAK ka kërkuar që Sali Berisha duhet të ruhet me policë tek dera në momentin që do të jetë në “arrest shtëpie”. Kjo masë është për të parandaluar mundësinë që ish-kryeministri të largohet nga shtëpia. Për avokatin e ish-kryeministrit Genc Gjokutaj kjo masë është e pa argumentuar dhe se po bëhet për t’u hakmarrë politikisht ndaj tij.
“Masa e sigurisë është kërkuar me mbikëqyrje policore, e pa mbështetur në ligj. Kjo tregon se nuk po bëhet proces i ligjshëm, por për t’u hakmarrë. Kjo është e paparashikuar në ligj. Në asnjë rast ligji nuk parashikon mbikëqyrje policore. Arresti shtëpiak është detyrimi ndaj atij që vendoset. Kjo që thoni ju është për persona që u kanë skaduar afatet e paraburgimit, që janë me rrezikshmëri. Kjo nuk mund të krahasohet me zotin Berisha. Për këtë nuk kishte argumente”, u shpreh përfaqësuesi ligjor i ish-kryeministrit.
