Që prej nisjes së aksionit të opozitës në Kuvend, mazhoranca ka marrë vendimin që në mënyrë anti-kushtetuese mbledhjet e komisioneve parlamentare t’i zhvillojë online. Skandali bëhet më i rëndë nga ajo se çfarë vihet re, ku një pjesë e mirë e deputetëve shfaqen me kamera të fikura, në makina, lokale, apo në aktivitetet të ndryshme, duke mos e patur fare mendjen tek ajo se çfarë diskutohet në komisione, veç faktit që në to nuk marrin pjesë as deputetët e opozitës.
Në lidhje me këtë skandal ka ardhur sot një reagim nga Instituti i Studimeve Politike. Ky i fundit ka marrë si shembull deputetin Saimit Hasalla, i cili në nisje të Komisionit të Ligjeve shfaqet në një ambient të mbyllur, më pas, gjatë kohës që prezantohen ndryshimet ligjore dhe diskutohet mbi to, deputeti zhduket nga ekrani, e më pas shfaqet në makinë duke votuar.
Nga fotoja e mëposhtme vihet re qartë, ai nuk është i vetmi, por ka disa deputetë të PS që votojnë ndryshimet ligjore nga makinat e tyre duke udhëtuar. Sipas ISP-së, votimi i sotëm në Kosmisionin e Ligjeve ishte absurde, fyese për integritetin e votës dhe procedurat parlamentare, teksa e konsideron si akt arrogance ndaj parimeve të transparencës dhe të llogaridhënies, integritetit dhe solemnitetit parlamentar.
“Në çdo vend dhe institucion serioz do të duhej të kishte hetim të rastit, zbatim të neneve penalizuese të Kodit të Sjelljes dhe Rregullores, etj, por në rastin tonë, Kuvendi nuk heton dhe as shqyrton gabimet/shkeljet e veta.” – thuhet më tej në reagimin e ISP-së.
ISP bën thirrje për rikthimin e mbledhjeve të Kuvendit në normalitet, sidomos të mbledhjeve të komisioneve dhe ngre shqetësimin se kjo praktikë joligjore po keqpërdoret për të kaluar ligje të diskutueshme dhe për të injoruar detyrimet e transparencës dhe të llogaridhënies, që sipas saj, po bëhen gjithnjë e më të mëdha.
Reagimi i plotë:
Votimi i ligjeve është një akt kushtetues, akt solemn dhe akt integriteti. Deputetët kanë funksionin ligjvënës dhe e ushtrojnë atë përmes disa standardeve etike dhe proceduriale të përcaktuara në Rregulloren e Kuvendit dhe në Kodin e Sjelljes. Shqyrtimi dhe votimi i ligjeve kërkojnë dokumentacion, debat, pyetje dhe diskutime, bindje personale dhe votim për çdo nen dhe në tërësi të aktit. Këto norma dhe parime klasike do të duhet të ishin të tilla edhe në rastin e Shqipërisë, por sot, pikërisht në debatin rreth ndryshimeve në ligjin për komisionet hetimore, në Komisionin e Ligjeve, komision që duhej të ishte model për komisionet e tjera në respektimin e Rregullores dhe procedurës, – u shënuan skena votimi absurde.
Në foton e parë është nisja e punës së komisionit dhe njëri prej deputetëve (S.H.) e nis mbledhjen nga një mjedis i mbyllur, i justifikuar në kushtet e mbledhjeve online. Gjatë kohës që prezantohen ndryshimet ligjore dhe diskutohet mbi to, deputeti zhduket nga ekrani, lëviz nga mjedisi i mbyllur dhe udhëton me makinë, (foto 2) duke kaluar gjysmën e mbledhjes duke drejtuar makinën live në faqen e Kuvendit (pa respektuar Kodin Rrugor që ndalon përdorimin e telefonit dhe detyron shoferin të ketë rrip sigurimi). Në fund të mbledhjes, ai ngre dorën dhe voton nga makina, – vota quhet e vlefshme, shumica arrihet dhe ndryshimet ligjore hyjnë në fuqi! Dhe nuk është i vetmi në foto që voton nga makina!
Kaq e thjeshtë, e lexueshme, publike, absurde, fyese për integritetin e votës dhe procedurat parlamentare ishte votimi i sotëm në Kuvend (Komisioni i Ligjeve). Fakti është publik, i verifikueshëm online në faqen e Kuvendit dhe si i tillë, akt arrogance ndaj parimeve të transparencës dhe të llogaridhënies, integritetit dhe solemnitetit parlamentar.
Në çdo vend dhe institucion serioz do të duhej të kishte hetim të rastit, zbatim të neneve penalizuese të Kodit të Sjelljes dhe Rregullores, etj, por në rastin tonë, Kuvendi nuk heton dhe as shqyrton gabimet/shkeljet e veta. Në rastin e fundit, drejtuesja e Komisionit të Ligjeve dhe dy anëtarë të tjerë të Komisionit, janë njëherësh shumicë vendimmarrëse (drejtues dhe anëtarë) të Sekretariatit për Etikën në Kuvend, organ që vlerëson respektimin e Rregullores në procedurat parlamentare dhe Kodin e Etikës. Prezenca e tyre së paku do të duhej të ishte element nxitës për respektimin formal të procedurave në një debat formal pa prezencë të opozitës dhe pa debat profesional midis deputetëve.
Instituti i Studimeve Politike (ISP) monitoron aktivitetin parlamentar dhe respektimin e Kodit të Sjelljes dhe Rregullores së Kuvendit. Nga ky angazhim ISP ka bërë thirrje disa herë për rikthimin e mbledhjeve të Kuvendit në normalitet, sidomos të mbledhjeve të komisioneve. Shqetësimi se kjo praktikë joligjore po keqpërdoret për të kaluar ligje të diskutueshme dhe për të injoruar detyrimet e transparencës dhe të llogaridhënies po bëhen gjithnjë e më të mëdha.
