Analisti Neritan Sejamini ka folur për mbledhjen e Këshillit të Mandateve, ku u votua “pro” autorizimit për arrestin me burg ose arrestin në shtëpi të Sali Berishës.
Sejamini tha se drejtësia, por edhe Kuvendi po veprojnë me dy standarde, duke përmendur edhe rastin e Saimir Tahirit, ku socialistët kërkuan prova konkrete nga prokurorët.
“Kur ka qenë rasti i zotit Saimir Tahiri, kërkoheshin edhe provat, jo vetëm relacioni dhe prokurorëve u thuhej, është shkelje e të drejtave të Tahirit nëse nuk sillni provat. Ajo që po ndodh është që kemi dy standarde. Komisioni i mandateve ka vepruar me dy standarde. Shikoni se çfarë ka ndodhur në rastin e Tahirit, janë mbajtur prokurorët dy ditë me orë të tëra, kërkonin prova dhe bënin pyetje. Sot, i njëjti grup parlamentar dhe i njëjti komision mandatesh kanë deklaruar se nuk merremi me asgjë tjetër, por miratojmë kërkesën. Nëse flasim për shtetin e së drejtës, të gjithë janë të barabartë dhe duhet të trajtohen njëlloj. Kemi rast pas rasti, që drejtësia e reformuar operon me standarde të dyfishta, në varësi të personit”, tha Sejamini në emisionin “Të Paekspozuarit”.
