Një 42-vjeçar është arrestuar dhe një tjetër është shpallur në kërkim në Sarandë, pasi akuzohen për trafikim automjetesh.
Në pranga ka rënë shtetasi F.M, i cili trafikonte në Shqipëri automjete të vjedhura nga Greqia. Në kërkim është shpallur bashkëpuntori i tij shtetasi A.M.
Ndërkohë janë sekuestruar dy automjete të vjedhura me vlerë rreth 40 000 euro.
“Specialistët e Seksionit për Hetimin e Trafiqeve të Paligjshme të DVP Vlorë, në bashkëpunim me shërbimet e Komisariatit të Policisë Sarandë, finalizuan operacionin policor të koduar “Detect”.
Në kuadër të operacionit u vu në pranga shtetasi F. M., 42 vjeç, dhe u shpall në kërkim shtetasi A. M., 29 vjeç, të dy banues në Sarandë.
Nga hetimet ka rezultuar se këta shtetas, në bashkëpunim me njëri-tjetrin, kanë trafikuar në Shqipëri, automjete të vjedhura kryesisht në Greqi, duke iu bërë ndryshime në elementet identifikuese dhe duke i pajisur këto automjete, me dokumente false, me qëllim shitjen në vendin tonë.
Në cilësinë e provës materiale u sekuestruan 2 automjete të dyshuara të vjedhura, tipe “Toyota” dhe “Peugeot”, me vlerë rreth 40 000 euro”,- njofton Policia.
Materialet procedurale i kaluan Prokurorisë, për veprime të mëtejshme.
