Detaje të reja kanë dalë në dritë nga plagosja me armë zjarri e tre shtetasve grekë në zonën e “Gazi” të Athinës.
Policia vendase thotë se tre grekët janë qëlluar nga dy shqiptarë me rrezikshmëri të lartë kriminale, por ende nuk e kanë bërë publik identitetin e tyre.
Sipas mediave greke, dy shqiptarët e shpallur në kërkim janë pjestarë të grupit “Lions” të cilët akuzohen edhe për vrasjen e 40 vjecarit Pëllumb Islami nga Delvina në 21 shkurt 2023.
Dyshimet janë se ata ose janë arratisur ose do tentojnë të arratisen në Shqipëri.
Si ndodhi plagosja e tre grekëve?
Ngjarja ndodhi ditën e djeshme në orët e para të mëngjesit jashtë një lokali nate në “Gazi” të Athinës. Dy shqiptarët kanë zbritur nga një fuoristradë tip “Range Rover” dhe kanë debatuar më fjalë me tre të rinj nga Kreta, të cilit kishin ardhur në Athinë për një “Bachelor Party” në një lokal në rrugën “Iakxou”. Pasi debatojnë me ta, pasagjeri i mjetit godet me grusht një nga grekët. Shoku i këtij te fundit godet me grusht shoferin e fuoristradës dhe kështu ky i fundit hapi zjarr ndaj tre grekëve.
Fillimisht ai qëllon të riun që po përleshej me bashkëpunëtorin e tij, më pas qëllon në kokë personin e dytë që po tenton të largohet, ndërsa nuk heziton të qëllojë edhe një pjesëtar të tretë të grupit, i cili po shikonte përleshjen.
Dy vëllezërit nga Malia e Kretës, të moshës 29 dhe 34 vjeç, janë në gjendje të rëndë në Klinikën e Neurokirurgjisë të Spitalit “Gennimatas”, me dëmtime në kokë, shkruajnë mediat e huaja.
Me plagë më të lehta po trajtohet edhe shoku i tyre 29-vjeçar, i cili ra përtokë i gjakosur pas sulmit vrasës.
Ende nuk dihet shkaku i konfliktit, që çoi më vonë në përdorimin e armvëe.
