Gjykata Themelore në Pejë ka caktuar një muaj paraburgim për dy personat e dyshuar për përdhunimin e 23-vjeçares me probleme të shëndetit mendor.
Gjykata e mori këtë vendim mbi arsyetimin e dhënë nga Prokuroria, e cila ka konsideruar që ekziston rreziku i ikjes së tyre duke pasur parasysh që vepra penale për të cilën ata dyshohen është e sanksionueshme me burgim prej 5 deri në 15 vjet burgim.
Si ndodhi ngjarja?
23-vjeçarja ishte nisur e vetme me autobus nga Tirana dhe kishte mbërritur në Pejë. Ajo është gjetur më 8 dhjetor pasi familjarët dhe policia kishin shkuar aty për ta kërkuar.
Në momentin kur vajza është gjetur, ajo ka qenë në gjendje shumë të rëndë psikologjike dhe shëndetësore, por pa shenja dhune në trup. Megjithatë, kontrollet mjekësore zbuluan se ajo ishte përdhunuar. Sipas autoriteteve, abuzimi seksual ka ndodhur në një shtëpi të pabanuar dhe dyshohet se janë të përfshirë dy persona. Sipas mediave në Kosovë, njëri nga të arrestuarit është babai i një ish-deputeti të Kuvendit të Kosovës.
Rasti vijon të jetë nën hetim nga autoritetet.
