Ish-ministri i Jashtëm, Paskal Milo, thotë se Greqia nuk do të lëvizë nga qëndrimi i saj për çështjen “Beleri”, ndaj mund tëjetë i nevojshëm një ndërmjetësim ndërkombëtar mes dy vendeve.
“Nuk duhet të kemi iluzione se Greqia do të heqë dorë nga këmbëngulja për çështjen Beleri, sepse është kapur fort pas një kategorie europiane që është respektimi i shtetit ligjor. Sundimi i ligjit është një nga kërkesat kryesore që u adresohet vendeve për të merituar anëtarësimin në BE. E shoh të vështirë që Greqia dhe Shqipëria të ulen e të gjejnë vetëkompromisin. E vetmja shpresë është një ndërmjetësim ndërkombëtar”, tha Milo në “MCN”.
Një tjetër çështje që e penalizon Shqipërinë në përpjekjen për t’u anëtarësuar në BE është sipas Milos edhe situata e brendshme politike. Milo tha se mosfunksionimi i demokracisë në institucionin më të lartë të vendit nuk mund të kalohet në heshtje nga BE.
“Në deklaratën e takimit BE-Ballkani Perëndimor e përmend edhe çështja e opozitës. Situata në Parlament ka shkuar shumë larg, gjë që nuk është në frymën e anëtarësimit në BE. Përsa kohë në Shqipëri ka një krizë politike, kjo nuk mund të kalojë në heshtje. Nuk funksionon demokracia në një vend si Kuvendi i Shqipërisë. Nuk ka sesi të përmbushen objektivat e mëdha. Pra janë dy çështje që i kanë dalë Shqipërisë dhe po e pengojnë tani. Situata që maxhoranca dhe opozita ndodhen në një situatë ekstreme, kjo nuk e ndihmon Shqipërinë”, tha ish-kryediplomati.
