Shkëlzen Berisha, djali i ish-kryeministrit Sali Berisha, nuk është paraqitur sot në seancën gjyqësore në GJKKO, ku ishte thirrur për herë të parë për të dëshmuar për çështjen e Gërdecit. GJKKO-së nuk i ka ardhur njoftimi që ai është vënë në dijeni të thirrjes në seancë, teksa sipas SPAK, Shkëlzen Berisha nuk banon në adresën e deklaruar.
Në seancën e sotme për Gërdecin në GJKKO ka dëshmuar dhe ish-ministri i Drejtësisë, Aldo Bumçi, i cili shpjegoi të gjithë procedurën se si kanë vepruar ministritë për formatimin e bazës ligjore për demontimin e armëve dhe vendosjen e Gërdecit si bazë.
Thirrja e Shkëlzen Berishës në të njëjtën seancë me Aldo Bumçin, lidhet me faksin që ky i fundit i ka dërguar Ministrit të Mbrojtjes së kohës Fatmir Mediu me shënimin “për Shkëlzen Berishën”, në pjesën e sipërme të dokumentit në krahun e majtë.
Në seancën e sotme, Bumçi ka deklaruar se kishte bërë një kallëzim pas shpërthimit në Gërdec, duke pretenduar se ishte e falsifikuar, por nuk ishte në gjendje të jepte shpjegime nëse Prokuroria e kishte konstatuar falsifikimin e kësaj shkrese.
Bumçi pranoi se e ka njohur Shkëlzen Berishën, por ka pretenduar se nuk ka pasur kontakte miqësore. Ai pranoi se e ka takuar në fund të vitit 2007, ku e ka pritur dy herë në zyrë Shkëlzen Berisha për arsye elektorale dhe se mohoi të kishte diskutuar për çështjen e armëve. Në seancën e sotme ka dëshmuar edhe ish-sekretarja e Bumçit e cila ka deklaruar se në atë kohë kur është dërguar faksi ka qenë me leje lindje.
Gjithashtu, Shkëlzen Berisha do të pyetej sot edhe për takime me ministrat e kohës në qeverinë Berisha dhe një telefonatë me Fatmir Mediun menjëherë pas shpërthimit në Gërdec, ku humbën jetën 26 persona e mbetën qindra të plagosur.
