Rasti Beleri po kthehet në një problem serioz për avancimin e integrimit, me palën greke që këmbëngul në lejimin e betimit të kryebashkiakut të zgjedhur të Himarës. Në të kundërt paralajmëron veto.
Qëndrimi u përsërit nga kryeministri grek në samitin BE-Ballkani Perëndimor të zhvilluar këtë mbrëmje në Bruksel, raportuan mediat helene. Sipas Kyriakos Mitsotakis, marrja e detyrës nga Fredi Beleri dhe e drejta e tij për një gjykim të drejtë nuk është një çështje dypalëshe midis Greqisë dhe Shqipërisë, por një çështje respekti për shtetin e së drejtës, që nga pala greke konsiderohet “kurora” e anëtarësimit në BE.
“Greqia pranoi t’i dërgonte Tiranës letrën e BE-së për hapin e parë të fillimit të negociatave, por me kusht që në fazën tjetër të procesit të ketë një lëvizje të qartë që Beleri të marrë përsipër detyrat dhe të respektojnë të drejtën e tij për një gjykim të drejtë, si dhe prezumimin e pafajësisë. Përndryshe, Greqia nuk do të pranojë fazat e ardhshme të procesit të anëtarësimit”, raportojnë mediat greke.
Kyriakos Mitsotakis u pa të zhvillonte një bisedë të shkurtër gjatë samitit me kryeministrin Edi Rama, i cili më herët është zotuar se çështja Beleri nuk do të kthehet në problem për integrimin. Kryebashkiaku i zgjedhur i Himarës ndërkohë, e akuzon kreun e qeverisë shqiptare se është pikërisht ai që qëndron pas arrestimit dhe mbajtjes së tij në qeli. Qëndrim që e përsëriti edhe dy ditë më parë, gjatë seancës në GJKKO, ku u rrëzua kërkesa e tij e përsëritur për të marrë leje me qëllim betimin si kryebashkiak. Beleri shprehet se “është marrë peng nga Rama” dhe qëllimi sipas tij, është interesi që kryeministri ka me pronat në Himarë.
Megjithëse i dështuar në misionin e avancimit të integrimit, Rama ka ‘shkëlqyer’ në një tjetër rol këtë të mërkurë në Bruksel.
Teksa liderët pjesëmarrës bëhet gati për foton e zakonshme familjare, kryeministri i Shqipërisë u shfaq në rolin e klounit. Me disa lëvizje duke imituar një dirigjent orkestre, ai arriti qëllimin dhe bëri për të qeshur kryeministrat e vendeve të tjera. Suksesi si gaztor mesa duket e kënaqi kaq shumë, saqë vendosi që performancën ta postojë edhe në rrjetet sociale.
