GJKKO ka rrëzuar kërkesën e Fredi Belerit për t’u betuar si kryebashkiak i Himarës. Sipas gjykatës, nuk ka një dispozitë ligjore që mund ta lejojë Belerin që të betohet, edhe pse më 14 maj ai fitoi bashkinë Himarë, përballë Jorgo Goros së PS-së.
Vendimi është shoqëruar me tensione dhe ovacione në sallën e gjyqit. “Turp, turp, të korruptuar”, kanë thirrur disa nga të pranishmit në seancë, mbështetës së Belerit.
Kreu i PBDNJ-së Vangjel Dule, tha për gazetarët pas vendimit se vendimi është ndikuar dhe paralajmëruar nga kryeministri Edi Rama.
“Çështja Beleri s’është asgjë më tepër se një kakofoni drejtësie ku teksti, muzikën, orkestrimin dhe interpretimin e realizon një autor ekskluziv – Edi Rama, kryeministër i vendit. Belerit prej 7 muajsh i privohet e drejta themelore kushtetuese e të zgjedhurit, ndërsa çdo qytetari të bashkisë së Himarës i privohet e drejta që të zgjedhin”, tha Dule.
“Rama kërkon me cdo kusht të mbajë në krye të bashkisë së Himarës, një kryetar të pavotuar, me qëllim që të vazhdojnë aferat korruptive, që kanë për synim tjetërsimin e statusit pronësor, në favore klienteliste. Kjo nuk është në ndërhyrje në punët e drejtësisë, është një mendim që secili mund ta shprehi”, shtoi ai.
Një qëndrim të ngjashëm ka mbajtur edhe Fredi Beleri gjatë seancës dëgjimore, duke akuzuar kreun e qeverisë Rama se po e mban pas hekurave për interesa politike dhe financiare në bashkinë e Himarës.
Kërkesa për tu betuar e Belerit është bërë objekt ping-pongu i gjykatave të vendit, duke kaluar nga GJKKO në Gjykatën e Durrësit e deri në Gjykatën e Lartë.
Seanca e sotme u ndoq dhe nga ambasadorja greke në Shqipëri, ndërsa çështja ka çuar në përplasje mes dy vendeve, me palën greke që paralajmëron veto në avancimin e Shqipërisë drrejt rrugës së intergrimit.
Ndërkohë, anëtarë të shoqatës “Omonia”, e cila përfaqëson interesat e pakicës greke në Shqipëri, organizuan pasdite një manifestim përpara dyerve të gjykatës, duke protestuar për mbajtjen e Belerit në qeli.
Fredi Beleri u arrestua dy ditë përpara votimeve të 14 majit nën dyshimet për shitblerje vote, dhe që atëherë ndodhet në paraburgim, ndërsa hetimet janë mbyllur dhe ka nisur procesi i gjylimit ndaj tij nën akuzën për “korrupsion aktiv në zgjedhje”. Vetë Beleri ka mohuar akuzat dhe është shprehur se procedi ndaj tij është politik dhe i urdhëruar nga kryeministri Edi Rama.
