Gazetari Elton Qyno dhe familja e tij u vendosen sot në terror nga SPAK. Me justifikimin e gjetjes së burimit për disa informacione të publikuara në media, SPAK ka ushtruar kontroll në banesën, zyrën dhe automjetin e gazetarit Elton Qyno.
Teksa hetuesit e BKH vijonin kontrollin në ambientet e televizionit ku ushtron detyrën, Qyno nëpërmjet telefonit ka treguar për Boldnews.al presionet që i kanë ushtruar në SPAK gjatë gjithë ditës së sotme. Ai tregon se fillimisht është thirrur për tu njohur me një urdhër të prokurorit të SPAK Behar Dibra, për ndalimin e publikimit të materialeve hetimore lidhur me çështjen e Nuredin Dumanit.
Më pas i kanë kërkuar të japë një deklarim për llogari të një procedimi të regjistruar nga kjo prokurori për “nxjerrje të sekretit hetimor”.
“Fillimisht më njoftuan të paraqitem për tu njohur me një urdhër të prokurorit Behar Dibra për ndalimin e publikimit të të dhënave për një çështje penale. Sapo mbërrita në ambientet e SPAK më kërkuan të jap një deklarim për të dhënat që unë kam publikuar. Behet fjalë për disa lajmë qe kam publikuar për çështjen ‘Dumani’. SPAK kërkon burimin e informacionit për dëshmitë dhe të dhënat që kanë rrjedhur më media. Pasi dhashë deklarim më thanë që duhet të më sekuestronin telefonat”, tregon gazetari Qyno për Boldnews.al.
Por sipas tij, presionet e SPAK nuk kanë përfunduar me pak. Pas sekuestrimit të telefonave të gazetarit, ata i kanë komunikuar se duhet të ushtrojnë kontroll në banesën e tij, në automjetin privat dhe në redaksinë e televizionit “Ora News”, ku punon gazetari Qyno.
“Me urgjencë prokurori Behar Dibra nxori urdhërim e kontrollit dhe sekuestros. Ky urdhër u konfirmua edhe nga gjyqtarja e posaçme Atalanta Zeqiri e cila vendosi kontrollin e shtëpisë, makinës dhe zyrës time”, thotë Qyno.
Oficerët e BKH e kanë shoqëruar atë në banesë ku kanë kryer kontroll dhe sekuestruar çdo dokument dhe pajisje elektronike.
“Sekuestruan çdo copë letër që gjetën, CD, pjesa më e madhe e të cilave me këngë, filma, apo lojërat e fëmijëve. USB që gjithashtu ju përkasin fëmijëve. Kompjuterin e shtëpisë dhe çdo gjë tjetër që hetuesit kanë menduar se ju vlen, pavarësisht nëse ka lidhje me çështjen”, thotë gazetari për Boldnews.
Por presionet e SPAK nuk kanë përfunduar me kaq. Deri në orën 22:30 të mbrëmjes se të mërkurës kur është kryer dhe kjo bisedë, kontrolli ka vijuar në redaksinë e televizionit ku punon gazetari Qyno. Ai thotë se hetuesit e BKH po ushtrojnë kontroll në redaksi ku përveç kompjuterit të tij kanë marrë edhe gjithë arkivën e tij si gazetar.
“Arkiva e punës sime 18-vjeçare si gazetar tashmë është në duart e SPAK. Akoma nuk arrij ta besoj atë që po ndodh. Presionet, kontrollet dhe sekuestrot që po kryhen po bëhen vetëm e vetëm që unë të tregoj burimin e informacionit. Unë nuk kam shkelur asnjë ligj. Unë kam bërë punën time si gazetar”, thotë Qyno teksa shton se hetuesit i kanë marrë edhe çelësin e automjetit të tij privat. Deri në orët e vona të mbrëmjes ai ishte ende i paqartë për statusin e tij ligjor në raport me hetimet e SPAK. Kjo strukturë duket se ka nisur një luftë të paprecedentë dhe të paligjshme ndaj medias.
Një rast i goditjes me protagonist SPAK-un dhe GJKKO-në ishte edhe ai ndaj Lapsi.al, pasi kjo media publikoi listat e patronazhistëve të PS dhe hodhi dritë mbi përdorimin e të dhënave të qytetarëve nga Partia Socialiste për llogari elektorale. Pas raportimeve, Gjykata e Posaçme miratoi një kërkesë të SPAK për sekuestrim të kompjuterëve, celularëve dhe çdo pajisje elektronike të redaksisë së Lapsi.al. Masa e sekuestros u rrëzua më pas nga Gjykata e të Drejtave të Njeriut në Strasburg.
