Kërkesa e SPAK për heqjen e imunitetit ndaj Sali Berishës me qëllim ashpërsimin e masës së sigurisë ndaj tij do të shqyrtohet të Hënën e 18 Dhjetorit.
Më herët gjatë ditës, Prokuroria e Posaçme kërkoi autorizimin nga Kuvendi për ashpërsimin e masës ndaj Berishës, lidhur me procedimin penal për privatizimin e ish-kompleksit sportiv “Partizani”. SPAK shprehet se ashpërsimi i masës kërkohet në kushtet kur Berisha nuk ka respektuar masën e detyrim paraqitjes, caktuar më herët ndaj tij nga GJKKO dhe konfirmuar më pas nga Apeli.
Referuar procedurës që përcakton ligji, kërkesa e prokurorisë do të shqyrtohet fillimisht në Këshillin e Mandateve. Mbledhja, siç ka vendosur kryetarja e Kuvendit Lindita Nikolla do të zhvillohet më 18 Dhjetor, në mesditë.
“Mbledhja e Këshillit për Rregulloren, Mandatet dhe Imunitetin për shqyrtimin e kërkesës së Prokurorisë së Posaçme Kundër Korrupsionit dhe Krimit të Organizuar për dhënien e autorizimit nga Kuvendi për arrestimin/heqjen e lirisë së deputetit Sali Berisha, nëpërmjet zëvendësimit të masës së sigurimit, do të zhvillohet në datën 18.12.2023, ora 12.00, në Kryesinë e Kuvendit”, njofton Kuvendi, duke iu referuar urdhërit numër 69 të marrë nga kryeparlamentarja këtë të martë.
Me shumë gjasa, këshilli do të miratojë kërkesën e SPAK. Më pas, vendimmarrja e dytë dhe finale i kalon Kuvendit. Pasi edhe ky institucion jep dritën jeshile, atëherë deputeti i nënshtrohet masave të gjykatës.
