Nga Boldnews.al
Pirro Vengu, drejtori që ka “dorë të lirë” me arabët nëpër këmbë,vijon çmenduritë. Muaj për muaj, Autoritetit Portual i Durrësit bën tendera me afate deri në 3 vite për zgjerimin apo mirëmbajtjen e territorit, në një kohë që në atë truall do të ndërtohet një kompleks nga firma arabe, e cila ka marrë tokën me 1 euro! Një paradoks i madh, pasi në këtë mënyrë shpenzojmë dy herë; 1 herë truallin shtetëror që ia falëm privatit dhe nga ana tjetër paratë po të shtetit që shpërdoron Pirrua. Kësaj herë, “bëmat” e tij vijnë me një tender për blerje automjetesh. Drejtori po ndjek “modën” e fundit dhe ka kërkuar të blejë makina elektrike. Madje ka kërkesa të veçanta për gjerësinë apo gjatësinë, ndërsa mjetet i do të vitit 2023. Normalisht, mjetet e 2023-shit dalin në muajin dhjetor, kur dhe Vengu ka hapur tenderin. Ai i kërkon me 0 km, aq sa edhe Rama do ta kishte zili. Megjithatë, duket se pas këtij drejtori shpërdorues qendron krahu i djathtë i vetë Ramës, Belnda Balluku, e cila pasi i mori firmën për trualljn i lejon që ai të bëjë disa shpenzime.
BoldNews.al ka siguruar dokumentet e këtij tenderi, i cili është fituar nga firma “Mektrin Motors”. Objekti i procedurës ka qenë “blerje makina elektrike”, një muaj nga dita e nënshkrimit të kontratës. Në tender kanë marrë pjesë “Mektrin Motors” (fituesi) me ofertë ekonomike 15.891.000 lekë pa TVSH. “Porche Albania” ka pasur në zarf 0 lekë dhe firma “Vibtis” me vlerë të ofertës ekonomike 14.418.000 lekë pa TVSH.
Pas hapjes së ofertave, ka filluar edhe krasitja e firmave. U s’kualifikua firma “Porche Albania” pasi nuk ka dorëzuar ofertë. Në këtë rast, ose firma e ka ditur se kush ka qenë fituesi ose në rastin tjetër ka hyrë për mos të thënë se kishte vetëm një ofertë. Ndërkohë, APD-ja s’kualifikoi edhe firmën që ofroi më pak “Vibtis”. Vengu kishte kërkuar një autojet elektrik 4499 mm dhe makina e kësaj firme ishte 4205 mm. Gjerësia e kërkuar nga APD-ja ishte 1820 mm, ndërsa gjerësia e oferuar ishte 1800. Pra, për vetëm disa cendimetra. Ndërkohë, kriteri i tretë ishte distanca aksiale. Vengu e kërkoi 2700 mm, ndërsa firma që u s’kualifikua e kishte 2600. Dhe, këto centimetra e kanë përjashtuar.
Dyshimet janë se dokumentet i janë përshtatur më së miri firmës fituese. Siç ndodh rëndom në zyrat e shtetit, të cilat i kërkojnë firmës së preferuar dokumentet e mallrave apo shërbimeve që kërkojnë për të shkruar DST-të e famshme (Dokumentet Standarte të Tenderit).
Në dokumentet shoqëruese, APD-ja thotë se kërkon 3 makina elektrike. Fondi për këtë procedurë, duke i shtuar edhe TVSH-në shkon në 192 milionë lekë të vjetra, ose rreth 190 mijë euro. Nga një kalkulim i thjeshtë del që 1 makinë që do të blejë Vengu kushton rreth 64 mijë euro. Një shumë e konsiderueshme!
Ndërkohë, krahas shumës, ky Autoritet e kërkon mjetin të vitit 2023, me 200 kuaj fuqi bateria të mbajë 450 kilometra, të ecë 160 km/h me 5 dyer dhe gjatësisë, gjerësitë apo lartësitë. Madje, Vengu e kërkon edhe me distancë aksiale të caktuar, duke përjashtuar në këtë mënyrë të gjithë konkurentët e tjerë! Pra, një paracaktim të fituesit. Makinat i kërkon 2 blu dhe 1 të zezë, xhama të zinj, me kamera parkimi.
