“SPAK kërkon të përligjë një akt antiligjor, antikushtetues që ka nisur ndaj Sali Berishës, një muaj më parë.” Ky është qëndrimi që ka mbajtur kreu i PD Sali Berisha, në studion e A2 CNN mbrëmjen e së martës, pasi Prokuroria e Posaçme i kërkoi ditën e sotme Parlamentit aprovim për arrestimin e tij.
“Është duplikim i krimit të tyre kushtetues. Në vend që të pranonte që ka shkelur Kushtetutën. (SPAK), Tani i thotë Parlamentit, më përligj aktin tim ashtikushtetues,” deklaroi Berisha.
I pyetur nëse janë ndërkombëtarët ata që po e “godasin” apo kundërshtari i tij politik, ish-kryeministri citoi një deklaratë të bërë më herët nga “Edi Rama, se reforma në drejtësi është bërë nga ai dhe jo nga anglo-amerikanët.”
“Ai u zotua në një fjalim mbi 35 minuta, që nuk ka të bëjmë me anglo-amerikanët, por është vepër e PS. Unë s’kam pse të merrem me njeri tjetër, veçse me Edi Ramën. Me këtë opozitë që po i bëjmë, e sheh se i ka ditët e shkurtra.”
Sipas Berishës, SPAK mund të ketë mbështetjen e SHBA-së, por siç u shpreh ai, asnjë institucion nuk në shkelje të ligjit, nuk mund të mbështetet.
Por si do ta votojnë deputetët e opozitës kërkesën e Prokurorisë për heqjen e imunitetit ndaj Berishës?
Sali Berisha bëri të ditur se deputetët e tij do të vijojnë mosbindjen civile, pra nuk do të marrin pjesë në votim. Ndërsa, sa i përket deputetëve të Lulzim Bashës, ai la të kupthej se për votën e tyre “nuk ka asnjë lloj interesi.”
Berisha tha se mosbindja civile do jetë e shumëformëshe dhe do të nisë shpejt. Ai u shpreh se një mungesë e tij e mundshme në protesta për shkak të një mase sigurie shtrënguese nga gjykata, jo vetëm që nuk do jetë një handikap por një frymëzim më shumë për opozitën.
Kryedemokrati tha se i qëndron qëllimit për ti siguruar shqiptarëve zgjedhje të lira. Kjo, shtoi ai, nuk mund të ndodhë me Edi Ramën në postin e kryeministrit dhe lajmëroi se ai do të rrëzohet nga pushteti falë aksionit opozitar. “Edi Rama nuk mund të jetë në zgjedhjet e ardhshme, beteja do jetë e përditshme. Edi Rama e ka inkriminuar veten në mënyrë të pakthyeshme”, theksoi kreu i PD.
I pyetur nëse do jetë pjesë e mbledhjes së Këshillit të Mandatave që do të shqyrtojë kërkesën e SPAK për ashpërsimin e masës së sigurisë ndaj tij, Berisha tha se për të marrë një vendim do të duhet fillimisht të këshillohet me avokatët.