Eksperti i ekonomisë, Alban Zusi komentoi në Fax News për Rovena Nezirin, buxhetin e ri për vitin 2024. Zusi shprehet se qasja e vetme e qeverisë ndaj turizmit, do të krijojë boshllëqe të tjera në ekonomi, pasi ka biznese që nuk mund të punojnë dot në turizëm. Specialitete të ndryshme nuk mund t’i përshtaten turizmit, pasi ai ka limitet e veta. Pra ky orientim sipas ekspertit mund të jetë i gabuar.
“Janë jetë të tëra njerëzish që janë të kërcënuara, në aspektin që do ngelen pa punë ose do të largohen sepse ecin me parimin që kemi turizmin. Por jo të gjithë bizneset mund të shkojnë edhe të punojnë në turizëm. Një specialist i mirë i drurit, letrës, tekstilit nuk shkon dot me punu në turizëm. Këto do çajnë ferrën do ikin. Do largohen njerëz të ditur. Do largohen menaxherët e këtyre bizneseve. Ndoshta një pjesë e tyre do ngelen pa punë, sepse një punëtore që qëron peshk, ku do shkojë ajo. Edhe turizmi ka një limit të caktuar të këtyre punonjësve. Çfarë do bëjnë? Do hedhin gjithë paratë, që i kanë prodhuar edhe këto biznese do i hedhin për të prodhuar kamarierë dhe pastrues dhomash. Kjo është ekonomia që duam?! Nuk besoj që ky është orientimi”, thotë eksperti.
Nga ana tjetër, Zusi komentoi edhe rritjen e pagës për administratën publike, e cila do të shkojë mesatarisht në 900 euro. Por sipas tij kjo rritje page e administratës publike nuk është se do të prodhojë zhvillim ekonomik. Rritje ekonomike prodhojnë sipas tij motorët e ekonomisë dhe atje duhen çuar paratë për t’i mbështetur.
“Pastaj kthehemi ke për të çuar pagat e punonjësve të administratës në 900 euro. Është fakt i njohur që administrata publike në të gjitha vendet e botës është pjesa më e ineficiente e shoqërisë. Në Zvicër po të kesh punuar 10 vjet në administratën publike ke pothuajse zero shanse që të futesh në administratë private. Ky është fakti. Edhe ne flasim që kemi një administratë publike paksa më të rënduar se sa ajo e Zvicrës. Nuk kam asnjë lloj kundërshtimi, le t’i rrisim. Por a do prodhojë rritje ekonomike kjo pagë atje?! Apo do prodhonte më tepër rritje ekonomike nëse do shkonte tek motorët ekonomisë të cilët rritjen e pagave e realizojnë përmes rritjes reale, rritjes performancës, rritjes rendimentit, përmes rritjes eksporteve. A t’i çojmë tek motori, apo t’i çojmë tek fasada, tek ngjyrat?!”, u shpreh Alban Zusi.
