Partia Socialiste po mban këtë të premte kongresin, një event i nisur rreth mesditës. Delegatëve pjesëmarrës në kongres u janë bërë kontrolle të rrepta para hyrjes në ambientet e Pallatit të Kongreseve, ku po mbahet mbledhja e Kongresit të PS.
Teksa postoi disa pamje nga hyrja në Pallatin e Kongreseve ku shihen masat e shtuara të sigurisë, Berisha shkroi në “FB” se Rama ka frikë të madhe nga delegatët.
Punimet u ndanë në 6 panele, ku kryesisht ministra, deputetë dhe kryebashkiakë të PS mbajtën fjalime. Fjalime që kryesisht ishin të përqendruar në shpalosjen e “arritjeve” të qeverisë nën drejtimin e Edi Rama. Nuk munguan as elozhet ndaj liderit, nga Elisa Spiropali, Erion Veliaj e të tjerë. Ndërkohë, kreu i PS dhe kryeministri Edi Rama pritet të mbajë një fjalim në 16:40.
Reagime për kongresin e PS pati nga kampi demokrat që nuk e pa me sy të mirë zgjedhjen e 8 Dhjetorit si ditën e zhvillimit të aktivitetit.
“Sot, Edi Rama mblidhet se mendon se na impresionon. Mblidhet me 8 dhjetor. Ai mblidhet në mendësinë e të atit të tij dhe dajës së tij xhelat”, tha kreu i PD-së, Sali Berisha në aktivitetin përkujtimor të Partisë Demokratike me rastin e 33-vjetorit të Lëvizjes studentore të Dhjetorit ’90, një përkujtim i cili bëhet çdo 8 dhjetor si ‘Dita e Rinisë’.
Ndërsa për ish-deputetin demokrat Luçiano Boçi me këtë lëvizje, Rama po përpiqet të vjedhë simbolikën e 8 Dhjetorit.
Kreu i grupit parlamentar të PD-së, Gazment Bardhi ironizoi përmes një reagimi në rrjetet sociale, duke kujtuar njerëzit e afërt të Ramës të dënuar dhe nën hetim nga drejtësia.
Zbulohet paneli i 7 i Kongresit të PS me temë diskutimi “Eksperienca më e mirë në luftën kundër korrupsionit në Qeverinë e Edi Ramës”. Për arsye “objektive” diskutimet do të zhvillohen online! pic.twitter.com/JryFkLyI83
— Gazment Bardhi (@GazmentBardhi) December 8, 2023
