Ndeshja mes Partizanit dhe Teutës, e cila ishte e prapambetur dhe e vlefshme për javën e parë të Superiores është mbyllur në barazim.
Sfida e zhvilluar në stadiumin “Niko Dovana”, përfundoi me rezultatin 1-1.
Pas kësaj sfide për mikrofonat e MCN TV, foli trajneri i Teutës, Edi Martini.
“Jo vetëm në pjesën e parë, por edhe në pjesën e dytë kishim rastet tona. Na vjen keq sepse djemtë dhanë shumë në fushën e lojës. Sidomos në pjesën e parë bëmë shumë mirë. Të marrësh 3 pikët është një detyrim në kokën e gjithësecilit. Na vjen keq sepse e merituam plotësisht fitoren”, u shpreh Martini.
-Me ndryshimin e sulmuesit kryesor (Dacit), u bë dhe kthesa…Mendon se u nxituat?
“Ne futëm Demirxhanin për të vapruar dhe markuar. Të sulmonte pak lart që të mos linim Partizanin që të afrohej tek porta. Daci ishte pikë referimi. Por shohim kush është më mirë gjatë javës që të futej dhe në ndeshjen e sotme. Për mua, presioni psikologjik ishte ajo që na pengoi pasi menduam të ktheheshim mbrapa për të ruajtur rezultatin. Nuk e merituam ta merrnim këtë barazim.”
-Ju pësoni disa gola naiv sistematikisht…
“Është e vërtetë. Atëherë që ke nevojë më tepër për të shënuar golin e dytë, e pësojmë. U zumë të papërgatitur dhe pësuam golin. Edhe lodhja ndikoi, ajo lodhje nga ndeshja e Kukësit. Rënia në pjesën e dytë erdhi për shkak që brenda 3 ditëve erdhi kjo ndeshje. Por kur fillon e keqja nuk di ku ndalet. Djemtë dhanë maksimumin, por një top i tillë na ndëshkoi. Po të shohim rastet duhej mbyllur shumë herët kjo ndeshje.”
-Renditja?
“Jemi larg ekipeve me 16 pikë, ne kemi 14. 3 pikë sot do të ishin më të ngrohta, por kemi edhe 3 ndeshje. Kemi Egnatian që është një ndeshje shumë e fortë. Më pas Erzeni dhe Dinamo. Duhet të japim maksimumin të marrim pikë dhe të jemi më të qetë. Tabela tregon që diferencat e ekipeve janë shumë të vogla.”
-Mendon se drama juaj është sulmi?
“Pjesa sulmuese e gjithë ekipit, sepse s’dua të ngarkoj asnjë me përgjegjësi sepse secili e di çfarë ka dhënë në fushën e lojës. Janë edhe 3 ndeshje dhe kemi kohë për rikuperuar gjërat. Nuk është çudi që të fitojmë të 3 ndeshjet e radhës, por as t’i humbësh nuk është çudi.”
