Në Kuvendin Kombëtar të PD-së së Rithemelimit, mjeku Erion Dasho ngriti akuza të forta ndaj qeverisjes socialiste sidomos në sektorin e Shëndetësinë. Në fjalën e tij ai e vuri theksin te degradimi i këtij sektori që sipas tij nuk qeveriset nga profesionistë. Sipas Dashos në çdo 5 lekë për shëndetësinë, 1 lek shkon për oligarkët.
“E kanë shkatërruar shëndetësinë me themel, e pamë këtë gjatë pandemisë ku u lanë të vdisnin 20 mijë njerëz duke e bërë Shqipërinë me numrin e lartë vdekje në botë. Për rilindjen ka rëndësi xhepat e oligarkëve 500 mijë euro ia kanë marrë shqiptarëve për t’ia dhënë oligarkëve. Në çdo 5 lekë për shëndetësinë 1 lek shkon për oligarkët. Ju them me garanci se shëndetësia shqiptare e ka kaluar pikën e moskthimit, është shkatërruar se rilindja ka qeverisur me klarinetistë, balerina dhe jo me profesionistë të shëndetësisë. Asnjë antivirus nuk i bën me punën dhe duhet riformatuar nga e para”.
Duke e akuzuar Ramën se i ka bërë të keqen më të madhe vendit me shpopullimin, ai tha se do të bëjë gjithçka për strategjinë qeverisëse të opozitës dhe për t’u dhënë shqiptarëve shpresë.
“Ne do të bëjmë gjithçka kemi në dorë për strategjinë tonë qeverisëse dhe planet zbatuese se vetëm kështu do t’i tregojmë shqiptarëve që nuk qeveriset me aventurierë. Rama ka hyrë në histori si hajdut, i korruptuar dhe që i ka bërë të keqen më të madhe Shqipërisë që është shpopullimi. Ta çojmë Boratin në koshin e plehrave të historisë. Uroj që 2024 t’i gjej demokratët e shqiptarët të gëzuar dhe t’i japë shpresën”.
