Prokuroria e Elbasanit në bashkëpunim me policinë e Gramshit ka zbardhur aksidentin në punë të regjistruar ditën e djeshme në HEC-in që po ndërtohet në fshatin Lenie të Gramshit, ku humbi jetën punëtori Fisnik Vrapi, 51 vjeç, nga Elbasani.
Autoritetet bëjnë me dije se kanë arrestuar drejtuesin e kamionçinës të firmës së ndërtimit si shkaktarin e aksidentit. Në pranga është vënë shtetasi Kujtim Hysa, 53 vjeç, banues në fshatin Mollas, për veprën penale “Shkelja e rregullave të qarkullimit rrugor”.
“Arrestimi i 53-vjeçarit u bë pasi rezultoi se gjatë procesit të punës për ndërtimin e një hidrocentrali, ka kryer manovra të gabuara me kamionçinën që drejtonte (automjet në pronësi të firmës së ndërtimit), dhe si pasojë është dëmtuar shtetasi Fisnik Vrapi, 51 vjeç, i cili humbi jetën gjatë transportimit në spital.” – thuhet në njoftimin e Policisë.
Në cilësinë e provës materiale u sekuestrua automjeti kamionçinë që dëmtoi shtetasin F. V.
