Arrestohet dhunuesi i gazetarit dhe njëherazi administratorit të një medie online, Gjergj Zefi.
Incidenti ndodhi më 3 tetor në rrugën “Bardhok Biba”, në Tiranë. 31-vjeçari Renato Bodurri, së bashku me disa persona të tjerë, akuzohen se kanë goditur me sende të forta gazetarin.
Këtë të shtunë, policia e Elbasanit njoftoi arrestimin e 31-vjeçarit.
“Vijon puna për identifikimin dhe kapjen e personave të tjerë të implikuar në këtë ngjarje. Në cilësinë e provës materiale u sekuestrua automjeti me të cilin dyshohet se 31-vjeçari është larguar nga vendi i ngjarjes, si dhe aparati i tij celular”, thuhet më tej në njoftimin e bluve.
Vetë gazetari është shprehur më herët se është dhunuar për shkak të detyrës.
