Prokuroria e Tiranës ka përfunduar hetimet paraprake dhe ka dërguar për gjykim Renato Bodurrin. Ky i fundit akuzohet për dhunimin në grup të gazetarit Gjergj Zefi, ngjarje e regjistruar më 3 Tetor të vitit 2023, në rrugën “Bardhok Biba” në Tiranë, duke i shkaktuar dëmtime të rënda.
Renato Bodurri është marrë i pandehur si i dyshuar për kryerjen e veprës penale “Goditje për shkak të detyrës”, kryer në bashkëpunim.
“Sipas hetimeve të kryera në kuadër të procedimit penal nr. 6833, Prokuroria konstatoi se Renato Bodurri, në bashkëpunim me persona të tjerë ende të paidentifikuar, ka goditur shtetasin Gjergj Zefi. Hetimet nisën pas referimeve nga Komisariati i Policisë nr. 3, pasi viktima u paraqit në Spitalin e Traumës me dëmtime në kokë, krah, buzën e poshtme dhe këmbët, duke mos kujtuar çfarë kishte ndodhur.
Pamjet filmike nga zona dhe dëshmia e një banori, i cili pa disa persona teksa godisnin Gjergj Zefi me shkop dhe largoheshin me një makinë të zezë, ndihmuan në identifikimin e automjetit të përdorur nga autorët.
Në përfundim të hetimeve, Prokuroria ka vendosur të çojë çështjen në gjyq, ndërsa hetimet për personat e tjerë të përfshirë vijojnë.” – thuhet në njoftimin e Prokurorisë.
Nga komunikimet e zbërthyera në aplikacionin “Sky Ecc”, Renato Bodurri del si një persin i afërt i grupit kriminal të dy vëllezërve Franc dhe Hajdar Çopja, por dhe i grupit kriminal të Suel Çelës.
Mbeten ende të paidentifikuar personat e tjerë që dhunuan gazetarin Gjergj Zefi.
