Federata Botërore e Tenisit (ATP) ka uruar festën e Pavarësisë së Shqipërisë në rrjetet sociale, ku foto e përzgjedhur ishte flamuri i ngritur me dron më 14 tetor 2014 në stadiumin e Partizanit të Beogradit, në ndeshjen Serbi-Shqipëri.
Pasi droni ngriti flamurin mbi fushë, pati trazira të mëdha dhe përplasje mes lojtarëve dhe tifozëve. Ndeshja u regjistrua me fitoren e Shqipërisë 3-0.
Pas këtij postimi të ATP, serbët janë revoltuar.
“Gëzuar Ditën e Pavarësisë, Shqipëri! Në këtë ditë madhështore, zemrat tona janë plot krenari teksa festojmë frymën e qëndrueshme të lirisë dhe bashkimit. Le të valojë me krenari flamuri autokton, simbol i historisë sonë të pasur dhe të tregojë forcën e kombit tonë. Në këtë ditë të shenjtë le të ngrihet shpirti ynë kolektiv sepse Shqipëria ishte, është dhe do të jetë përgjithmonë zemra e identitetit tonë të përbashkët”, thuhet në njoftim.
Për këtë njoftim kanë reaguar edhe mediat serbe, të cilat mendojnë se nuk ka qenë rastësi.
“Nuk ka dyshim se profili i organizimit të tenisit është zgjedhur qëllimisht, duke qenë se serbi Novak Xhokoviç është më i miri në histori, ndaj shqiptarët, të paktën për një kohë të shkurtër, u përpoqën që të paktën në një farë mënyre të tërheqin vëmendjen e publikut të tenisit për veten e tyre. Kur nuk i kanë lojtarët e tyre, vendosën të bëjnë këtë përpjekje të turpshme”, shkruan Blic.
