Gjykata e Posaçme vlerëson se pozita e ish-ministrit të Shëndetësisë Ilir Beqaj, në procedimin penal për koncesionin e sterilizimit, është lehtësuar nga Prokuroria e Posaçme.
Sipas GJKKO, krahas shpërdorimit të detyrës, ndaj ish-ministrit duhet të ngrihet akuzë penale edhe për veprën penale të falsifikimit të vulave, stampave dhe formularëve.
Gjithashtu, konstaton se ndaj Beqajt duhet një masë më e ashpër sigurie se ajo e detyrim paraqitjes dhe ndalimi i lëvizjes jashtë vendit, të kërkuar nga SPAK.
Akuza
Referuar vendimit të gjyqtarit të posaçëm Erion Bani, Beqaj ka konsumuar edhe veprën penale të falsifikimit të vulave, stampave dhe formularëve, për të cilën parashikohet dënimi deri në 7 vite burg.
“…Gjykata çmon se në respektim të parimit të ligjshmërisë dhe cilësimit të drejtë të faktit penale të sjellë nga prokuroria për vlerësim përpara gjyqtarit të hetimit paraprak ekziston dyshimi i arsyeshëm i bazuar në prova se personi nën hetim I.B. krahas figurës së veprës penale ‘Shpërdorim i detyrës’ i kryer në bashkëpunim parashikuar nga neni 248 dhe 25 i Kodit Penal, ka konsumuar edhe elementët e figurës së veprës penale të ‘Falsifikimit të vulave, stampave dhe formularëve’ nga personi që ka për detyrë hartimin e tyre, parashikuar nga neni 190 paragrafi i tretë i Kodit Penal, ku parashikohet shprehimisht se: “Falsifikimi ose përdorimi i vulave, i stampave apo i formularëve të falsifikuar ose paraqitja e rrethanave të rreme në këto të fundit, që u drejtohen organeve shtetërore, dënohet me burgim nga gjashtë muaj deri në katër vjet. Kur kjo vepër kryhet në bashkëpunim ose më shumë se një herë apo ka sjellë pasoja të rënda, dënohet me burgim nga gjashtë muaj deri në pesë vjet. Kur falsifikimi bëhet nga personi që ka për detyrë hartimin e tyre, dënohet me burgim nga tre deri në shtatë vjet”, thuhet në vendimin e datës 20 Nëntor 2023, që la në fuqi masën e detyrim paraqitjes dhe ndalimit të lëvizjes jashtë vendit për Beqajn.
Masa e sigurisë
Gjyqtari Bani vlerëson gjithashtu se Ilir Beqaj është personi kyç në kryerjen e procedurave në koncesionin e sterilizimit të seteve kirurgjikale, vlera e të cilit është fryrë artificialisht.
Dhe sipas tij, një masë sigurie më e butë se arresti në burg rrezikon prishjen e hetimeve apo shmangien e ballafaqimit me drejtësinë të të akuzuarit.
“Gjykata, vlerëson se në çështjen objekt gjykimi, duke pasur parasysh sanksionin e veprës penale dhe prirjen normale dhe natyrore të çdokujt për gëzimin e lirisë personale ka vend për të dyshuar racionalisht se, personi nën hetim I.B. ka nevojë të sigurohet, për t’i caktuar një masë sigurimi personal, për të garantuar vijimësisht prezencën e të dyshuarit në procedimin penal në ngarkim të tij, si për të siguruar normalitetin e hetimit dhe të gjykimit në çështjen në ngarkim të tij, dhe për të siguruar që ai të mos largohet, të fshihet por t’i nënshtrohet ekzekutimit (vuajtjes) së dënimit kur vendimi i dënimit të ketë marrë formë të prerë. Ndodhur në këto kushte, Gjykata vlerëson se për personin nën I.B. masa më e përshtatshme që arrin të sigurojë nevojat e procedimit penal të nisur, për të garantuar mospërsëritjen e së njëjtës vepër penale, largimin e tij, marrjen dhe vërtetësinë e provave si dhe për të garantuar ekzekutimin e dënimit me burgim që mund të caktojë gjykata e themelit në rastin konkret, për shkak të rrezikshmërisë së veçantë të veprave dhe autorit në rastin konkret, është ajo e ‘Arrestit në burg’ parashikuar nga neni 238 i K.Pr.Penale. Këtu duhet theksuar fakti se cilësimi juridik i faktit penal i bërë nga prokurori dhe i sjellë për vlerësim përpara gjyqtarit të hetimit paraprak, është i gabuar”, thuhet në vendim.
Lidhur me faktin që GJKKO ka aprovuar kërkesën e prokurorëve të SPAK Edvin Kondili dhe Ened Nakuçi për të lënë në fuqi masën detyrim paraqitje dhe ndalim për të lëvizur jashtë vendit për Beqajn, është argumentuar me hapësirën e veprimit të ligjit. GJKKO ka shpjeguar se gjykata nuk mund të vendosë një masë të ashpër sigurie se ajo që kërkon SPAK.
